ਪਟਾਕਾ ਵੇਚਣ ਵਾਲੇ ਬੋਲੇ: ਇਸ ਵਾਰ ਵੇਚਣ ਦਿਓ ਪਟਾਖੇ, ਅਗਲੀ ਵਾਰ ਦੀਵਾਲੀ ਹੀ ਨਹੀਂ ਮਨਾਵਾਂਗੇ

ਗੁਰਦਾਸਪੁਰ 21 ਅਕਤੂਬਰ( ਡਾ ਬਲਜੀਤ ਸਿੰਘ .ਨੀਰਜ ਸ਼ਰਮਾ. ਜਸਬੀਰ ਸਿੰਘ) ਪਿਛਲੇ 5 ਸਾਲਾਂ ਤੋਂ ਮੁਕੰਮਲ ਪਟਾਕਾ ਵਿਕਰੇਤਾ ਵੱਲੋਂ ਪਟਾਕੇ ਲਾਉਣ ਵਾਲੀ ਥਾਂ ਨੂੰ ਲੈ ਕੇ ਹਰ ਸਾਲ ਪ੍ਰਸ਼ਾਸਨ ਅਤੇ ਪਟਾਕਾ ਵਿਕਰੇਤਾਵਾਂ ਵਿੱਚ ਵਿਵਾਦ ਹੁੰਦਾ ਹੈ, ਜਿਸ ਕਾਰਨ ਪਟਾਕੇ ਵੇਚਣ ਵਾਲਿਆਂ ਨੂੰ ਕਦੇ ਸਿਆਸਤਦਾਨਾਂ ਅਤੇ ਕਦੇ ਪ੍ਰਸ਼ਾਸਨ ਦੀ ਮਿੰਨਤਾਂ ਕਰਨੀਆਂ ਪੈਂਦੀਆਂ ਹਨ।ਪਿਛਲੀ ਸਰਕਾਰ ਵਿੱਚ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਕਿਹਾ ਸੀ ਕਿ ਉਹ ਖੁਦ ਇਸ ਦੌਰ ਵਿੱਚੋਂ ਲੰਘੇ ਹਨ ਕਿ ਉਹ ਪਟਾਕੇ ਵੇਚ ਕੇ ਆਪਣੇ ਘਰ ਦਾ ਪਾਲਣ ਪੌਸ਼ਣ ਕਰਦੇ ਰਹੇ ਹਨ, ਜਿਸ ਕਾਰਨ ਉਨ੍ਹਾਂ ਹਿਦਾਇਤਾ ਕੀਤੀਆਂ ਸਨ ਕਿ ਕੋਈ ਵੀ ਪ੍ਰਸ਼ਾਸਨਿਕ ਅਧਿਕਾਰੀ ਪਟਾਕੇ ਵਿਕਰੇਤਾਵਾਂ ਨੂੰ ਤੰਗ ਨਹੀਂ ਕਰੇਗਾ। ਜਦੋਂ ਕਿ ਹੁਣ ਸੂਬੇ 'ਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਹੈ, ਅਜਿਹੇ 'ਚ ਇਸ ਵਾਰ ਫਿਰ ਪ੍ਰਸ਼ਾਸਨ ਨੇ ਹਾਈਕੋਰਟ ਦੇ ਹੁਕਮਾਂ ਦਾ ਹਵਾਲਾ ਦਿੰਦੇ ਹੋਏ ਪ੍ਰਚੂਨ ਪਟਾਕੇ ਵੇਚਣ ਵਾਲਿਆਂ ਨੂੰ ਹੁਕਮ ਜਾਰੀ ਕੀਤਾ ਹੈ ਗਿਆ ਹੈ ਕਿ ਇਹ ਲੋਕ ਆਪਣੇ ਪਟਾਕੇ ਸ਼ਹਿਰ ਦੇ ਬਾਹਰ ਗੁਰੂ ਨਾਨਕ ਕੈਂਪਸ ਦੇ ਸਾਹਮਣੇ ਵਾਲੇ ਮੈਦਾਨ ਵਿਚ ਵੇਚਣਗੇ ਅਤੇ ਉਹ ਵੀ ਉਹੀ ਲੋਕ ਪਟਾਕੇ ਵੇਚਣਗੇ ਜਿਨਾਂ ਨੂੰ ਆਰਜੀ ਲਾਇਸੰਸ ਪ੍ਰਸ਼ਾਸਨ ਵੱਲੋਂ ਦਿੱਤਾ ਗਿਆ ਹੈੇੇ। ਪਟਾਕੇ ਵੇਚਣ ਵਾਲਿਆਂ ਦੀ ਗਿਣਤੀ ਸੈਂਕੜਿਆਂ ਵਿੱਚ ਹੈ ਜਦ ਕਿ ਗੁਰਦਾਸਪੁਰ ਵਿੱਚ ਸਿਰਫ 4 ਅਰਜ਼ੀ ਲਾਇਸੰਸ ਜਾਰੀ ਕੀਤੇ ਗਏ ਹਨ।ਗੁਰਦਾਸਪੁਰ ਦੇ ਮੇਹਰ ਚੰਦ ਰੋਡ 'ਤੇ ਇਕੱਠੇ ਹੋਏ ਪਟਾਕਾ ਵਿਕਰੇਤਾ ਐਸੋਸੀਏਸ਼ਨ ਦੇ ਮੈਂਬਰਾਂ ਚੰਦਨ ਕੁਮਾਰ, ਵਿਸ਼ਾਲ ਕਾਲੀਆ, ਗੋਪਾਲ ਕ੍ਰਿਸ਼ਨ, ਵਿਪਨ ਕੁਮਾਰ ਅਮਿਤ ਮਹਾਜਨ ਆਦਿ ਨੇ ਦੱਸਿਆ ਕਿ ਜੇਕਰ ਸੂਬਾ ਸਰਕਾਰ ਹਿੰਦੂ ਤਿਉਹਾਰ ਦੀਵਾਲੀ ਨੂੰ ਐਨੀ ਨਫ਼ਰਤ ਕਰਦੀ ਹੈ ਤਾਂ ਉਹ ਪਟਾਕੇ ਬਣਾਉਣ ਵਾਲੀਆਂ ਫੈਕਟਰੀਆਂ ਨੂੰ ਬੰਦ ਕਿਉਂ ਨਹੀਂ ਕਰ ਦਿੰਦੀ, ਫੈਕਟਰੀ ਵਿੱਚ ਪਟਾਕੇ ਬਣਾਉਣ ਤੋਂ ਬਾਅਦ ਇਹ ਥੋਕ ਵਿਕਰੇਤਾਵਾਂ ਤੱਕ ਪਹੁੰਚ ਜਾਂਦੇ ਹਨ। ਥੋਕ ਵਿਕਰੇਤਾਵਾਂ ਤੋਂ ਪਟਾਖਾ ਪ੍ਰਚੂਨ ਵਿੱਚ ਖਰੀਦਿਆ ਜਾਂਦਾ ਹੈ ਅਤੇ ਜਦੋਂ ਪ੍ਰਚੂਨ ਵਿਕਰੇਤਾ ਇਸ ਖਰੀਦ ਦੇ ਪਟਾਕੇ ਨੂੰ ਵੇਚਣ ਲਈ ਆਪਣੀਆਂ ਆਰਜੀ ਦੁਕਾਨਾਂ ਸਜਾ ਲੈਂਦੇ ਹਨ ਤਾਂ ਪ੍ਰਸ਼ਾਸਨ ਆਪਣਾ ਡੰਡਾ ਤਿੱਖਾ ਕਰ ਲੈਂਦਾ ਹੈ, ਜੋ ਕਿ ਸਰਾਸਰ ਗਲਤ ਹੈ।ਦੱਸ ਦਈਏ ਕਿ 3 ਸਾਲ ਪਹਿਲਾਂ ਹਾਈਕੋਰਟ ਵੱਲੋਂ ਪਟਾਕੇ ਚਲਾਉਣ 'ਤੇ ਪੂਰਨ ਪਾਬੰਦੀ ਲਗਾਈ ਗਈ ਹੈ ਪਰ ਇਸ ਦੇ ਬਾਵਜੂਦ ਸੂਬੇ ਭਰ 'ਚ ਚੱਲ ਰਹੀਆਂ ਫੈਕਟਰੀਆਂ ਵਿੱਚ ਪਟਾਕੇ ਬਣਦੇ ਹਨ ਅਤੇ ਸਪਲਾਈ ਵੀ ਹੁੰਦੇ ਹਨ। ਪਟਾਕੇ ਵੇਚਣ ਵਾਲਿਆਂ ਦਾ ਕਹਿਣਾ ਹੈ ਕਿ ਜਦੋਂ ਬਾਜ਼ਾਰ ਵਿੱਚ ਪਟਾਕੇ ਵਿਕਦੇ ਹਨ ਤਾਂ ਹੀ ਕਿਉਂ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਹਾਈਕੋਰਟ ਦੇ ਹੁਕਮਾਂ ਦੀ ਯਾਦ ਆਉਂਦੀ ਹੈ। ਲੋਕਾਂ ਨੇ ਡਿਪਟੀ ਕਮਿਸ਼ਨਰ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਇਸ ਵਾਰ ਦੀਵਾਲੀ ਦੇ ਤਿਉਹਾਰ ਤੇ ਉਹਨਾਂ ਨੂੰ ਪਟਾਕੇ ਵੇਚਣ ਦੀ ਇਜਾਜ਼ਤ ਦੇ ਦਿੱਤੀ ਜਾਵੇ। ਅਗਲੇ ਸਾਲ ਤੋਂ ਨਾ ਤਾਂ ਉਹ ਪਟਾਕੇ ਵੇਚਣਗੇ ਅਤੇ ਨਾ ਹੀ ਦੀਵਾਲੀ ਦਾ ਤਿਉਹਾਰ ਮਨਾਉਣਗੇ। ਇਸ ਮੌਕੇ ਬੀਕੇ ਕਾਲੀਆ, ਸੁਮਿਤ ਕੁਮਾਰ, ਸੰਜੀਵ ਕੁਮਾਰ ,ਅਨਿਲ ਕੁਮਾਰ, ਗੌਰੀ ਸ਼ਰਮਾ ਸਮੇਤ ਵੱਡੀ ਗਿਣਤੀ ਵਿੱਚ ਲੋਕ ਹਾਜ਼ਰ ਸਨ।