ਗੁਰਦਾਸਪੁਰ ਚ ਟਰੱਕ ਦਾ ਨੰਬਰ ਲਗਾ ਕੇ ਘੁੰਮ ਰਹੀ ਇਕ ਕਾਰ ਸਵਾਰ ਅੌਰਤ ਨੇ ਕੀਤਾ ਡਰਾਮਾ ਪੁਲਿਸ ਵੱਲੋਂ ਕਾਰ ਕੀਤੀ ਜ਼ਬਤ

ਗੁਰਦਾਸਪੁਰ 4 ਸਤੰਬਰ (ਡਾ ਬਲਜੀਤ ਸਿੰਘ .ਨੀਰਜ ਸ਼ਰਮਾ ਜਸਬੀਰ ਸਿੰਘ ) : ਇੱਥੋਂ ਦੇ ਕਾਹਨੂੰਵਾਨ ਚੌਕ ਵਿਚ ਮਾਹੌਲ ਉਸ ਸਮੇਂ ਭਖ ਗਿਆ ਜਦੋਂ ਇਕ ਔਰਤ ਨੇ ਪੁਲਿਸ ਵੱਲੋਂ ਕਾਰ ਦੀ ਤਲਾਸ਼ੀ ਲੈਣ ਦੀ ਗੱਲ ਕਹੇ ਜਾਣ 'ਤੇ ਡਰਾਮਾ ਕਰਨਾ ਸ਼ੁਰੂ ਕਰ ਦਿੱਤਾ। ਦਰਅਸਲ, ਕਾਰ ਦੇ ਸ਼ੀਸ਼ਿਆਂ 'ਤੇ ਜ਼ੈੱਡ ਬਲੈਕ ਫਿਲਮ ਲੱਗੀ ਹੋਈ ਸੀ। ਪੁਲਿਸ ਨੇ ਇਸ 'ਤੇ ਇਤਰਾਜ਼ ਜ਼ਾਹਿਰ ਕੀਤਾ ਸੀ। ਔਰਤ ਨੇ ਪੁਲਿਸ ਨੂੰ ਕਾਰ ਦੀ ਤਲਾਸ਼ੀ ਲੈਣ ਤੇ ਕਾਗਜ਼ ਵਿਖਾਉਣ ਤੋਂ ਨਾਂਹ ਕਰ ਦਿੱਤੀ ਸੀ।ਇਸ ਪਿੱਛੋਂ ਪੁਲਿਸ ਅਧਿਕਾਰੀ ਮੌਕੇ ’ਤੇ ਪੁੱਜੇ ਤੇ ਔਰਤ ਤੋਂ ਪੁੱਛਗਿੱਛ ਕਰਨੀ ਚਾਹੀ। ਔਰਤ ਕਰੀਬ ਇਕ ਘੰਟੇ ਤਕ ਕਾਰ ਦੇ ਸ਼ੀਸ਼ੇ ਬੰਦ ਕਰ ਕੇ ਅੰਦਰ ਬੈਠੀ ਰਹੀ। ਫਿਰ ਪੁਲਿਸ ਨੇ ਔਰਤ ਦੀ ਕਾਰ ਇੰਪਾਉਂਡ ਕਰਕੇ ਕਬਜ਼ੇ ਵਿਚ ਲੈ ਲਈ। ਪੁਲਿਸ ਮੁਲਾਜ਼ਮਾਂ ਦਾ ਦੋਸ਼ ਹੈ ਕਿ ਔਰਤ ਨੇ ਉਨ੍ਹਾਂ ਨਾਲ ਬਦਸਲੂਕੀ ਕੀਤੀ ਹੈ। ਜਦਕਿ ਔਰਤ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਉਸ ਦੇ ਨਾਲ ਬਦਸਲੂਕੀ ਕੀਤੀ ਹੈ। ਇਸ ਬਾਰੇ ਥਾਣਾ ਸਿਟੀ ਦੇ ਐੱਸਐੱਚਓ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਪੁਲਿਸ ਪਾਰਟੀ ਨੇ ਕਾਹਨੂਵਾਨ ਚੌਕ ਵਿਚ ਕਾਰ ਚਾਲਕ ਔਰਤ ਨੂੰ ਰੋਕਿਆ ਸੀ। ਸ਼ੀਸ਼ਿਆਂ ’ਤੇ ਜ਼ੈੱਡ ਬਲੈਕ ਫਿਲਮ ਚੜ੍ਹੀ ਹੋਈ ਸੀ। ਜਦੋਂ ਕਾਰ ਸਵਾਰ ਔਰਤ ਤੋਂ ਪੁੱਛਗਿੱਛ ਕੀਤੀ ਤਾਂ ਪਹਿਲਾਂ ਉਸ ਨੇ ਕਾਰ ਦੇ ਸ਼ੀਸ਼ੇ ਨਹੀਂ ਖੋਲ੍ਹੇ। ਇਸ ਕਾਰਨ ਉਥੇ ਜਾਮ ਲੱਗ ਗਿਆ। ਜਦੋਂ ਇਸਤਰੀ ਪੁਲਿਸ ਮੁਲਾਜ਼ਮਾਂ ਸੱਦ ਕੇ ਕਾਰ ਦੇ ਸ਼ੀਸ਼ੇ ਖੁਲ੍ਹਾਏ ਤਾਂ ਔਰਤ ਨੇ ਆਪਣੀ ਕਾਰ ਦੇ ਕਾਗਜ਼ ਪੱਤਰ ਵਿਖਾਉਣ ਤੋਂ ਨਾਂਹ ਕਰ ਦਿੱਤੀ। ਉਹ ਕਹਿ ਰਹੀ ਸੀ ਕਿ ਕਾਰ ਦੇ ਕਾਗਜ਼ ਘਰ ਵਿਚ ਪਏ ਹਨ। ਜਦੋਂ ਔਰਤ ਨੂੰ ਕਾਰ ਵਿੱਚੋਂ ਬਾਹਰ ਆਉਣ ਲਈ ਕਿਹਾ ਗਿਆ ਤਾਂ ਉਸ ਨੇ ਨਾਂਹ ਕਰ ਦਿੱਤੀ ਤੇ ਕਿਸੇ ਅਫ਼ਸਰ ਨਾਲ ਫੋਨ ’ਤੇ ਗੱਲਬਾਤ ਕਰਨ ਲੱਗ ਪਈ। ਜਦੋਂ ਕਾਰ ਦਾ ਨੰਬਰ ਟਰੇਸ ਕੀਤਾ ਤਾਂ ਇਹ ਕਿਸੇ ਟਰੱਕ ਦਾ ਨੰਬਰ ਨਿਕਲਿਆ। ਇਸ ਲਈ ਕਾਰ ਇੰਪਾਉਂਡ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਦੂਜੇ ਪਾਸੇ ਔਰਤ ਦਾ ਕਹਿਣਾ ਹੈ ਕਿ ਉਸ ਦੀ ਕਾਰ ਦੇ ਕਾਗਜ਼ ਘਰ ਵਿਚ ਪਏ ਹਨ, ਕਾਲੀ ਫਿਲਮ ਬੱਚਿਆਂ ਨੇ ਚੜ੍ਹਾਈ ਸੀ। ਉਸ ਦਾ ਪਿਤਾ ਹਸਪਤਾਲ ਵਿਚ ਦਾਖ਼ਲ ਹੈ। ਉਸ ਨੇ ਦਾਅਵਾ ਕੀਤਾ ਕਿ ਕਾਰ ਉਸ ਦੇ ਨਾਂ ’ਤੇ ਰਜਿਸਟ੍ਰਡ ਹੈ।