ਮਜ਼ਦੂਰ ਮੁਕਤੀ ਮੋਰਚਾ ਅਤੇ ਸੀ ਪੀ ਆਈ ਐੱਮ ਐਲ ਲਿਬਰੇਸ਼ਨ ਵੱਲੋਂ ਹੱਕੀ ਮੰਗਾਂ ਨੂੰ ਲੈ ਕੇ ਮਜੀਠਾ ਬਲਾਕ ਮੂਹਰੇ ਰੋਸ ਰੈਲੀ ਕੀਤੀ ਗਈ

ਅੰਮ੍ਰਿਤਸਰ,15 ਸਤੰਬਰ (ਡਾ ਬਲਜੀਤ ਸਿੰਘ ,ਨੀਰਜ ਸ਼ਰਮਾ) - ਅੱਜ‌ ਮਜੀਠਾ ਬਲਾਕ ਦਫ਼ਤਰ ਵਿੱਚ ਮਜ਼ਦੂਰ ਮੁਕਤੀ ਮੋਰਚਾ ਅਤੇ ਸੀ ਪੀ ਆਈ ਐਮ ‌ਐਲ ਲਿਬਰੇਸ਼ਨ ਦੇ ਮਜ਼ਦੂਰ ਆਗੂ ਮਦਨਜੀਤ ਸਿੰਘ‌ ਅਤੇ ਕਸ਼ਮੀਰ ਸਿੰਘ ਵੱਲੋਂ ਹਜਾਰਾ ਮਜ਼ਦੂਰਾਂ ਦੇ ਭਰਵੇਂ ਇਕੱਠ ਦੀ ਅਗਵਾਈ ਕਰਦਿਆਂ ਮਜ਼ਦੂਰ ਮੰਗਾਂ ਦੇ ਹੱਕ ਵਿੱਚ ਰੋਸ ਰੈਲੀ ਕੀਤੀ ਗਈ। ਰੈਲੀ ਵਿੱਚ ਬੋਲਦਿਆਂ ਮਜ਼ਦੂਰ ਮੁਕਤੀ ਮੋਰਚਾ ਦੇ ਸੂਬਾ ਮੀਤ

ਪ੍ਰਧਾਨ ਨਿਰਮਲ ਛੱਜਲਵੱਡੀ, ਪੰਜਾਬ ਕਿਸਾਨ ਯੂਨੀਅਨ ਦੇ ਸੂਬਾਈ ਆਗੂ ਬਲਬੀਰ ਸਿੰਘ ਝਾਮਕਾ ਅਤੇ ਲਿਬਰੇਸ਼ਨ ਦੇ ਸੂਬਾ ਸਕੱਤਰ ਕਾਮਰੇਡ ਗੁਰਮੀਤ ਸਿੰਘ ਬੱਖਤਪੁਰਾ ਨੇ‌ ਕਿਹਾ ਕਿ ਬਲਾਕ ਅਧਿਕਾਰੀਆਂ ਵੱਲੋਂ ਹਰ ਪਿੰਡ ਵਿੱਚ ਮਨਰੇਗਾ ਦਾ ਰੋਜ਼ਗਾਰ ਪਾਰਦਰਸ਼ੀ ਢੰਗ ਨਾਲ ਲਾਗੂ ਕਰਵਾਇਆ ਜਾਵੇ ਅਤੇ ਹਰ 15 ‌ਦਿਨ ਬਾਅਦ ਮਜ਼ਦੂਰੀ ਦਾ ਭੁਗਤਾਨ ਕੀਤਾ ਜਾਵੇ, ਪੰਜਾਬ ਸਰਕਾਰ ਬੇਘਰਿਆਂ ਨੂੰ 5/5 ਮਰਲੇ ਦੇ ਪਲਾਟ ਦੇਣ, ਔਰਤਾਂ ਨੂੰ 1000‌‌ ਰੁਪਏ ਦੇਣ, ਬੁਢਾਪਾ ਅਤੇ ਵਿਧਵਾ ਪੈਨਸ਼ਨ 2500 ਰੁਪਏ ਕਰਨ, ਮਜ਼ਦੂਰਾਂ ਅਤੇ ਕਿਸਾਨਾਂ ਦਾ ਕਰਜ਼ਾ ਮੁਆਫ਼ ਕਰਨ ਅਤੇ ਬੇਰੁਜ਼ਗਾਰਾਂ ਨੂੰ ਬੇਰੁਜ਼ਗਾਰੀ ਭੱਤਾ ਦੇਣ ਆਦਿ ਵਰਗੀਆਂ ਕੀਤੀਆਂ ਗਰੰਟੀਆ ਪੂਰੀਆਂ ਕਰੇ। ਆਗੂਆਂ ਨੇ ਭਗਵੰਤ ਮਾਨ ਸਰਕਾਰ ਦੀ ਅਲੋਚਨਾਂ ਕਰਦਿਆਂ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਪਹਿਲੀਆਂ ਸਰਕਾਰਾਂ ਦੀ ਤਰਜ਼ ਉਪਰ ਜਨਤਾ ਨਾਲ ਝੂਠ ਦੀਆਂ ਗਰੰਟੀਆ ਕਰਕੇ ਵੋਟਾਂ ਦੀ ਠੱਗੀ ਮਾਰੀ ਹੈ। ਬੱਖਤਪੁਰਾ ਨੇ‌ ਕਿਹਾ ਕਿ ਮਾਨ ਸਰਕਾਰ ਦੇ ਰਾਜ ਵਿੱਚ ਜਿਸ ਪੱਧਰ ਉਪਰ ਨਸ਼ਿਆਂ ਦਾ ਕਾਰੋਬਾਰ ਚੱਲ ਰਿਹਾ ਹੈ, ਅਮਨ ਕਾਨੂੰਨ ਦੀ ਜ਼ੋ ਦੁਰਦਸ਼ਾ ਹੋ ਰਹੀ ਹੈ, ਇਸ ਤੋਂ ਜ਼ਾਹਰ ਹੁੰਦਾ ਹੈ ਕਿ ਮੁੱਖ ਮੰਤਰੀ ਭਗਵੰਤ ਮਾਨ ਘੋਰ ਨਿਕੰਮਾ ਅਤੇ ਤਜਰਬੇਹੀਣ ਮੁੱਖ ਮੰਤਰੀ ਹੈ। ਮੁੱਖ ਮੰਤਰੀ ਦੇ ਭ੍ਰਿਸ਼ਟਾਚਾਰ ਵਿਰੁੱਧ ਲੜਾਈ ਲੜਨ ਦੇ ਦਾਅਵੇ ਵੀ ਥੋਥੇ ਸਾਬਤ ਹੋਏ ਹਨ ਕਿਉਂਕਿ ਹਰ ਸਰਕਾਰੀ ਦਫਤਰ ਵਿਚ ਪਹਿਲਾਂ ਤੋਂ‌ ਵੀ ਵਧੇਰੇ ਭਿਰਸ਼ਟਾਚਾਰ ਚੱਲ ਰਿਹਾ ਹੈ। ਸਰਕਾਰ ਦੇ ਮੰਤਰੀ, ਐਮ ‌ਐਲ ਏਜ ਖੁਦ ਭ੍ਰਿਸ਼ਟਾਚਾਰ ਵਿੱਚ ਗਲਤਾਨ ਹਨ। ਇਸ ਮੌਕੇ ਬਚਨ ਸਿੰਘ ਪਾਖਰਪੁਰਾ,ਹੀਰਾ ਸਿੰਘ ਹਰੀਆਂ, ਕੁਲਜੀਤ ਕੌਰ ਅਜਾਇਬਵਾਲੀ, ਪਰਮਜੀਤ ਕੌਰ ਝੰਡੇ, ਕੰਵਲਜੀਤ ਕੌਰ ਕਾਦਰਬਾਦ, ਬਲਦੇਵ ਸਿੰਘ ਭੰਗਾਲੀ‌‌ ਅਤੇ ਰਤਨ ਸਿੰਘ ਅਟਵਾਲ ਹਾਜ਼ਰ ਸਨ।