ਬਟਾਲਾ ਚ ਚੋਰੀ ਦੀ ਕੋਸ਼ਿਸ਼ ਹੋਈ ਨਾਕਾਮ. ਤਾਂ ਚੋਰਾਂ ਨੇ ਫੈਕਟਰੀ ਨੂੰ ਲਾਈ ਅੱਗ

ਬਟਾਲਾ 21 ਅਕਤੂਬਰ (ਡਾ ਬਲਜੀਤ ਸਿੰਘ .ਨੀਰਜ ਸ਼ਰਮਾ .ਜਸਬੀਰ ਸਿੰਘ ) ਬਟਾਲਾ ਦੀ ਡੀਲਕਸ ਪੁਲੀ ਦੇ ਨਜ਼ਦੀਕ ਰੰਧਾਵਾ ਨਗਰ ਹਰਨਾਮ ਨਗਰ 'ਚ ਸਥਿਤ ਲੋਹੇ ਦੀ ਫੈਕਟਰੀ ਵਰਿੰਦਰ ਇੰਡਸਟਰੀ ਕਾਰਪੋਰੇਸ਼ਨ 'ਚ ਮੰਗਲਵਾਰ ਦੀ ਰਾਤ ਨੂੰ ਅਣਪਛਾਤੇ ਚੋਰਾਂ ਵੱਲੋਂ ਚੋਰੀ ਕਰਨ ਦੀ ਕੋਸ਼ਸ਼ਿ ਕੀਤੀ ਗਈ, ਚੋਰੀ ਦੀ ਕੋਸ਼ਸ਼ਿ ਨਾਕਾਮ ਹੋਣ ਤੇ ਅਣਪਛਾਤੇ ਚੋਰਾਂ ਨੇ ਦਫਤਰ 'ਚ ਅੱਗ ਲਗਾ ਦਿੱਤੀ ਅਤੇ ਮੌਕੇ 'ਤੇ ਫਰਾਰ ਹੋ ਗਏ।ਅੱਗ ਲੱਗਣ ਕਾਰਨ ਦਫਤਰ 'ਚ ਐਲਈਡੀ, ਵਾਈਫਾਈ ਸੈੱਟਅੱਪ, ਏਸੀ, ਬੈੱਡ, ਡੀਵੀਆਰ, ਕੈਮਰਾ ਸੜ੍ਹ ਕੇ ਸੁਆਹ ਹੋ ਗਿਆ। ਘਟਨਾ ਦਾ ਬੁੱਧਵਾਰ ਸਵੇਰੇ ਪਤਾ ਲੱਗਾ, ਜਿਸ ਦੀ ਸ਼ਕਿਾਇਤ ਥਾਣਾ ਸਿਵਲ ਲਾਈਨ ਦੀ ਪੁਲਿਸ ਨੂੰ ਕੀਤੀ ਗਈ, ਜਿਸ ਤੋਂ ਬਾਅਦ ਥਾਣਾ ਸਿਵਲ ਲਾਈਨ ਦੀ ਪੁਲਿਸ ਨੇ ਮੌਕੇ 'ਤੇ ਪਹੁੰਚ ਕੇ ਸਥਿਤੀ ਦਾ ਜਾਇਜ਼ਾ ਲਿਆ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਫੈਕਟਰੀ ਮਾਲਕ ਵਰਿੰਦਰ ਸਹਿਦੇਵ ਦੇ ਪੁੱਤਰ ਰੋਹਿਤ ਸਹਿਦੇਵ ਵਾਸੀ ਪੇ੍ਮ ਨਗਰ ਦਾਰਾ ਸਲਾਮ ਨੇ ਦੱਸਿਆ ਕਿ ਉਸ ਦੀ ਰੰਧਾਵਾ ਨਗਰ ਵਿਖੇ ਵਰਿੰਦਰ ਇੰਡਸਟਰੀ ਕਾਰਪੋਰੇਸ਼ਨ ਦੇ ਨਾਂ 'ਤੇ ਫੈਕਟਰੀ ਹੈ ਅਤੇ ਉਸ ਫੈਕਟਰੀ 'ਚ ਲੋਹੇ ਦਾ ਕੰਮ ਕੀਤਾ ਜਾਂਦਾ ਹੈ। ਫੈਕਟਰੀ ਨੂੰ ਬੰਦ ਕਰਨ ਤੋਂ ਬਾਅਦ ਬੁੱਧਵਾਰ ਤੜਕਸਾਰ ਕਰੀਬ 2.30 ਵਜੇ ਕੋਈ ਅਣਪਛਾਤਾ ਚੋਰ ਫੈਕਟਰੀ ਦੇ ਮੇਨ ਗੇਟ 'ਤੇ ਚੜ੍ਹ ਕੇ ਅੰਦਰ ਦਾਖਲ ਹੋ ਗਿਆ। ਇਸ ਤੋਂ ਬਾਅਦ ਦਫਤਰ ਦੇ ਦਰਵਾਜ਼ੇ ਦਾ ਤਾਲਾ ਅਤੇ ਸ਼ੀਸ਼ਾ ਤੋੜ ਕੇ ਦਫਤਰ ਦੇ ਅੰਦਰ ਦਾਖਲ ਹੋ ਗਿਆ।ਇਸ ਤੋਂ ਬਾਅਦ ਦਫ਼ਤਰ ਦੀ ਗੋਲਕ 'ਚ ਪਏ ਕੁਝ ਪੈਸੇ ਕੱਢੇ, ਫਿਰ ਦਫਤਰ 'ਚ ਪਈ ਅਲਮਾਰੀ ਨੂੰ ਲੋਹੇ ਦੀ ਰਾਡ ਨਾਲ ਖੋਲ੍ਹਣ ਦੀ ਕੋਸ਼ਸ਼ਿ ਕੀਤੀ, ਪਰ ਉਹ ਅਸਫਲ ਰਿਹਾ। ਉਸ ਨੂੰ ਪਤਾ ਸੀ ਕਿ ਫੈਕਟਰੀ ਦੇ ਅੰਦਰ ਅਤੇ ਬਾਹਰ ਕੈਮਰੇ ਲੱਗੇ ਹੋਏ ਹਨ, ਜਿਸ ਤੋਂ ਬਾਅਦ ਉਸ ਨੇ ਦਫਤਰ 'ਚ ਐੱਲਈਡੀ, ਬੈੱਡ ਨੂੰ ਅੱਗ ਲਗਾ ਦਿੱਤੀ, ਜਿਸ ਨਾਲ ਵਾਈਫਾਈ, ਡੀਵੀਆਰ, ਕੈਮਰੇ ਅਤੇ ਏਸੀ ਅੱਗ ਦੀ ਭੇਟ ਚੜ੍ਹ ਗਏ। ਚੋਰ ਆਪਣੇ ਸੰਦ ਉੱਥੇ ਹੀ ਛੱਡ ਕੇ ਫੈਕਟਰੀ ਦੇ ਮੇਨ ਗੇਟ ਰਾਹੀਂ ਫਰਾਰ ਹੋ ਗਿਆ। ਉਸ ਨੇ ਦੱਸਿਆ ਕਿ ਆਲੇ-ਦੁਆਲੇ ਫੈਕਟਰੀਆਂ ਹੋਣ ਕਾਰਨ ਅੱਗ ਲੱਗਣ ਬਾਰੇ ਕਿਸੇ ਨੂੰ ਪਤਾ ਨਹੀਂ ਲੱਗਾ। ਚੋਰ ਪੂਰਾ ਸ਼ਾਤਰ ਸੀ, ਜਿਸਨੇ ਚਿਹਰੇ ਨੂੰ ਲੁਕਾਉਣ ਲਈ ਕੱਪੜੇ ਨਾਲ ਮੂੰਹ ਢੱਕਿਆ ਹੋਇਆ ਸੀ। ਚੋਰ ਦੀ ਸੀਸੀਟੀਵੀ ਫੁਟੇਜ ਵਿੱਚ ਫੋਟੋ ਵੀ ਆਈ ਹੈ, ਜਿਸ ਨੂੰ ਸਿਵਲ ਲਾਈਨ ਪੁਲਿਸ ਹਵਾਲੇ ਕਰ ਦਿੱਤਾ ਗਿਆ ਹੈ ਅਤੇ ਥਾਣਾ ਸਿਵਲ ਲਾਈਨ ਵਿੱਚ ਸ਼ਕਿਾਇਤ ਦਰਜ ਕਰਵਾਈ ਗਈ ਹੈ।