ਦੋ ਨੌਜਵਾਨਾਂ ਨੇ ਆਰਐਮਪੀ ਡਾਕਟਰ ਦਾ ਕਿਰਚਾਂ ਮਾਰ ਕੇ ਦਿਨ ਦਿਹਾੜੇ ਕੀਤਾ ਕਤਲ

ਬਟਾਲਾ:10 ਅਕਤੂਬਰ ( ਡਾ ਬਲਜੀਤ ਸਿੰਘ .ਨੀਰਜ ਸ਼ਰਮਾ. ਜਸਬੀਰ ਸਿੰਘ ) ਬਟਾਲਾ ਦੇ ਸਟਾਫ ਰੋਡ 'ਤੇ ਐਤਵਾਰ ਸ਼ਾਮ ਨੂੰ ਦੋ ਨੌਜਵਾਨਾਂ ਵੱਲੋਂ ਆਰਐੱਮਪੀ ਡਾਕਟਰ ਦਾ ਕਤਲ ਕਰ ਦਿੱਤਾ ਗਿਆ। ਹਮਲਾਵਰਾਂ ਨੇ ਕਿਰਚਾਂ ਨਾਲ ਹਮਲਾ ਕਰਕੇ ਡਾਕਟਰ ਦਾ ਕਤਲ ਕੀਤਾ ਹੈ। ਪੁਲਿਸ ਨੇ ਦੋ ਹਮਲਾਵਰਾਂ ਵਿੱਚੋਂ ਇੱਕ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਦੂਜਾ ਮੁਲਜ਼ਮ ਫਰਾਰ ਹੈ। ਪੁਲਿਸ ਇਸ ਕਤਲ ਦਾ ਕਾਰਨ ਰੰਜਿਸ਼ ਦੱਸ ਰਹੀ ਹੈ।ਇਸ ਦੇ ਨਾਲ ਹੀ ਕਾਤਲਾਂ ਨੇ ਡਾਕਟਰ 'ਤੇ 10 ਤੋਂ ਵੱਧ ਵਾਰ ਕਿਰਚਾਂ ਨਾਲ ਹਮਲਾ ਕੀਤਾ ਹੈ। ਇਸ ਤੋਂ ਇਲਾਵਾ ਮ੍ਰਿਤਕ ਡਾਕਟਰ ਦੇ ਸਿਰ ’ਚ ਵੀ ਗਹਿਰੀ ਚੋਟ ਦਿਖਾਈ ਦਿੱਤੀ ਹੈ। ਮ੍ਰਿਤਕ ਡਾਕਟਰ ਦੀ ਪਛਾਣ ਗੁਰਮੀਤ ਸਿੰਘ ਅੜੀ ਪੁੱਤਰ ਜਵੰਤ ਸਿੰਘ ਵਾਸੀ ਸਟਾਫ ਰੋਡ ਬਟਾਲਾ ਵਜੋਂ ਹੋਈ ਹੈ। ਖਬਰ ਲਿਖੇ ਜਾਣ ਤੱਕ ਥਾਣਾ ਸਿਵਲ ਲਾਈਨ ਦੀ ਪੁਲਿਸ ਨੇ ਦੋ ਨੌਜਵਾਨਾਂ ਖਿਲਾਫ ਕਤਲ ਦਾ ਮਾਮਲਾ ਦਰਜ ਕਰ ਲਿਆ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਡਾ. ਗੁਰਮੀਤ ਸਿੰਘ (62 ਸਾਲਾਂ) ਬਟਾਲਾ ਦੇ ਸਟਾਫ ਰੋਡ 'ਤੇ ਸਥਿਤ ਕਲੀਨਿਕ ਚਲਾ ਰਿਹਾ ਸੀ ਅਤੇ ਸਾਹਮਣੇ ਉਸਦਾ ਕਲੀਨਿਕ ਸੀ ਅਤੇ ਪਿੱਛੇ ਉਸਦਾ ਘਰ ਸੀ। ਉਹ ਘਰ ਵਿੱਚ ਇਕੱਲਾ ਰਹਿੰਦਾ ਸੀ। ਉਸ ਦੀ ਪਤਨੀ (ਸੇਵਾਮੁਕਤ ਏਐੱਸਆਈ ਪੰਜਾਬ ਪੁਲਿਸ) ਜਿਸ ਦੀ ਕਰੀਬ ਡੇਢ ਸਾਲ ਪਹਿਲਾਂ ਮੌਤ ਹੋ ਚੁੱਕੀ ਹੈ। ਮ੍ਰਿਤਕ ਡਾਕਟਰ ਦਾ ਇਕਲੌਤਾ ਪੁੱਤਰ ਤੇ ਉਸਦੀ ਪਤਨੀ ਸੂਰਤ ਵਿੱਚ ਨੌਕਰੀ ਕਰਦੇ ਹਨ। ਐਤਵਾਰ ਸ਼ਾਮ ਨੂੰ ਜਦੋਂ ਮਰੀਜ਼ ਡਾਕਟਰ ਗੁਰਮੀਤ ਸਿੰਘ ਦੇ ਕਲੀਨਿਕ ਤੋਂ ਡਾਕਟਰ ਨਾ ਹੋਣ ਕਾਰਨ ਵਾਪਸ ਜਾ ਰਹੇ ਸਨ, ਤਾਂ ਜਦੋਂ ਡਾਕਟਰ ਦੀ ਭਾਲ ਵਿੱਚ ਗੁਆਂਢੀ ਡਾਕਟਰ ਦੇ ਘਰ ਪਹੁੰਚੇ ਤਾਂ ਮਿ੍ਤਕ ਡਾਕਟਰ ਦੀ ਲਾਸ਼ ਖੂਨ ਨਾਲ ਲੱਥਪੱਥ ਸੀ।