ਬਟਾਲਾ ਚ ਵਾਪਰੀ ਘਟਨਾ ! ਮੈਨੇਜਰ ਦੀ ਧੌਣ ਤੇ ਦਾਤਰ ਰੱਖ ਕੇ ਲੁਟੇਰਿਆਂ ਨੇ ਲੁੱਟੇ 1.27 ਰੁਪਏ ਲੁੱਟ ਲਏ

ਬਟਾਲਾ/28 ਅਗਸਤ (ਡਾ ਬਲਜੀਤ ਸਿੰਘ ਨੀਰਜ ਸ਼ਰਮਾ.ਜਸਬੀਰ ਸਿੰਘ ) - ਥਾਣਾ ਰੰਗੜ ਨੰਗਲ ਦੀ ਪੁਲਸ ਨੇ ਦਾਤਰ ਦੀ ਨੋਕ 'ਤੇ ਮੈਨੇਜਰ ਕੋਲੋਂ 1.27 ਲੱਖ ਰੁਪਏ ਅਤੇ ਟੈਬ ਖੋਹਣ ਵਾਲੇ 3 ਅਣਪਛਾਤੇ ਨੌਜਵਾਨਾਂ ਵਿਰੁੱਧ ਕੇਸ ਦਰਜ ਕੀਤਾ ਹੈ। ਇਸ ਸਬੰਧੀ ਏ. ਐੱਸ. ਆਈ. ਚੰਨਣ ਸਿੰਘ ਨੇ ਦੱਸਿਆ ਕਿ ਪੁਲਸ ਨੂੰ ਦਰਜ ਕਰਵਾਈ ਸ਼ਿਕਾਇਤ 'ਚ ਰਿੰਕੂ ਕੁਮਾਰ ਪੁੱਤਰ ਧਰਮਪਾਲ ਵਾਸੀ ਤਿੱਬੜ ਨੇ ਦੱਸਿਆ ਕਿ ਉਹ ਭਾਰਤ ਫਾਇਨਾਂਸ ਕੰਪਨੀ ਬਟਾਲਾ 'ਚ ਬਤੌਰ ਮੈਨੇਜਰ ਡਿਊਟੀ ਕਰਦਾ ਹੈ।ਮਿਤੀ 25 ਅਗਸਤ ਨੂੰ ਉਹ ਆਪਣੇ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਲੋਨ ਦੀਆਂ ਕਿਸ਼ਤਾਂ ਇਕੱਠੀਆਂ ਕਰਨ ਲਈ ਵੱਖ-ਵੱਖ ਪਿੰਡਾਂ 'ਚ ਗਿਆ ਸੀ। ਇਸ ਦੌਰਾਨ ਉਸਨੇ ਇਕ ਲੱਖ 56 ਹਜ਼ਾਰ 277 ਰੁਪਏ ਦਾ ਕੈਸ਼ ਇਕੱਠਾ ਕੀਤਾ ਸੀ, ਜਿਸ 'ਚੋਂ 1 ਲੱਖ 27 ਹਜ਼ਾਰ 277 ਰੁਪਏ, ਇਕ ਟੈਬ ਅਤੇ ਬਾਈਓਮੈਟ੍ਰਿਕ ਆਪਣੀ ਕਿੱਟ 'ਚ ਪਾ ਲਏ ਅਤੇ 23,830 ਰੁਪਏ ਆਪਣੀ ਪੈਂਟ ਦੀਆਂ ਜੇਬਾਂ 'ਚ ਪਾ ਕੇ ਨਸੀਰਪੁਰ ਤੋਂ ਪਿੰਡ ਢਡਿਆਲਾ ਨਜ਼ਾਰਾ ਨੂੰ ਕੱਚੇ ਰਸਤੇ 'ਤੇ ਜਾ ਰਿਹਾ ਸੀ। ਕਰੀਬ ਸ਼ਾਮ 6 ਵਜੇ ਜਦੋਂ ਉਹ ਪਿੰਡ ਢਡਿਆਲਾ ਨਜ਼ਾਰਾ ਤੋਂ ਥੋੜਾ ਪਿੱਛੇ ਪੁੱਜਾ ਤਾਂ ਰਸਤੇ 'ਚ 3 ਅਣਪਛਾਤੇ ਮੋਟਰਸਾਈਕਲ ਸਵਾਰ ਨੌਜਵਾਨਾਂ ਨੇ ਉਸ ਨੂੰ ਰੋਕ ਲਿਆ। ਇਕ ਨੌਜਵਾਨ ਨੇ ਉਸਦੀ ਧੋਣ 'ਤੇ ਦਾਤਰ ਰੱਖ ਦਿੱਤਾ, ਜਦਕਿ ਦੂਸਰੇ ਨੇ ਕੁੱਟਮਾਰ ਕੀਤੀ ਅਤੇ ਬੈਗ ਖੋਹ ਕੇ ਫ਼ਰਾਰ ਹੋ ਗਏ। ਪੁਲਸ ਨੇ ਰਿੰਕੂ ਕੁਮਾਰ ਦੇ ਬਿਆਨਾਂ ਦੇ ਆਧਾਰ 'ਤੇ 3 ਅਣਪਛਾਤੇ ਨੌਜਵਾਨਾਂ ਵਿਰੁੱਧ ਕੇਸ ਦਰਜ ਕਰ ਦਿੱਤਾ ਗਿਆ ਹੈ।