ਬਟਾਲਾ ਚ ਪਿਟਬੁੱਲ ਕੁੱਤੇ ਨੇ ਨਾਬਾਲਗ ਬੱਚੇ ਨੂੰ ਨੋਚ ਨੋਚ ਕੇ ਕੀਤਾ ਗੰਭੀਰ ਜ਼ਖ਼ਮੀ

ਬਟਾਲਾ 31 ਜੁਲਾਈ(ਬਲਜੀਤ ਸਿੰਘ. ਨੀਰਜ ਸ਼ਰਮਾ) ਬਟਾਲਾ ਦੇ ਪਿੰਡ ਕੋਟਲੀ ਭਾਨ ਸਿੰਘ 'ਚ ਪਿਟਬੁਲ ਕੁੱਤੇ ਨੇ 13 ਸਾਲਾ ਬੱਚੇ 'ਤੇ ਹਮਲਾ ਕਰਕੇ ਉਸ ਨੂੰ ਬੁਰੀ ਤਰਾਂ੍ਹ ਨੋਚ-ਨੋਚ ਕੇ ਗੰਭੀਰ ਜ਼ਖ਼ਮੀ ਕਰ ਦਿੱਤਾ ਹੈ। ਜੇ ਬੱਚੇ ਦੇ ਪਿਤਾ ਮੌਕੇ 'ਤੇ ਉਸ ਪਿਟਬੁੱਲ ਕੁੱਤੇ ਤੋਂ ਨੌਜਵਾਨ ਨੂੰ ਨਾ ਬਚਾਉਂਦਾ ਤਾਂ ਨੌਜਵਾਨ ਦੀ ਜਾਨ ਜਾ ਸਕਦੀ ਸੀ। ਫਿਲਹਾਲ ਬੱਚੇ ਦਾ ਇਲਾਜ ਬਟਾਲਾ ਦੇ ਸਿਵਲ ਹਸਪਤਾਲ 'ਚ ਚੱਲ ਰਿਹਾ ਹੈ।ਇਸ ਸਬੰਧੀ ਜ਼ਖਮੀ ਗੁਰਪ੍ਰਰੀਤ ਸਿੰਘ (13) ਨੇ ਦੱਸਿਆ ਕਿ ਸ਼ੁੱਕਰਵਾਰ ਦੇਰ ਸ਼ਾਮ ਉਸ ਦਾ ਪਿਤਾ ਖੇਤਾਂ 'ਚ ਯੂਰੀਆ ਪਾਉਣ ਗਿਆ ਸੀ ਤੇ ਉਹ ਵੀ ਆਪਣੇ ਪਿਤਾ ਨਾਲ ਖੇਤਾਂ 'ਚ ਹੀ ਸੀ। ਕੰਮ ਦਾ ਹੱਥ ਵਟਾ ਰਿਹਾ ਸੀ। ਇਸ ਤੋਂ ਬਾਅਦ ਉਹ ਆਪਣੇ ਪਿਤਾ ਨਾਲ ਪਿੰਡ ਆ ਰਿਹਾ ਸੀ ਕਿ ਰਸਤੇ 'ਚ ਪਿੰਡ ਦੇ ਹੀ ਇੱਕ ਨੌਜਵਾਨ ਨੇ ਹੱਥ ਵਿੱਚ ਪਿੱਟਬੁੱਲ ਕੁੱਤਾ ਫੜਿ੍ਹਆ ਹੋਇਆ ਸੀ ਤੇ ਅਚਾਨਕ ਕੁੱਤਾ ਉਹਨਾਂ ਨੂੰ ਦੇਖ ਕੇ ਭੌਂਕਣ ਲੱਗਾ ਤਾਂ ਕੁੱਤੇ ਦੇ ਮਾਲਕ ਨੇ ਕੁੱਤੇ ਨੂੰ ਛੱਡ ਦਿੱਤਾ। ਉਸ ਨੇ ਦੱਸਿਆ ਕਿ ਕੁੱਤੇ ਨੇ ਉਸ 'ਤੇ ਹਮਲਾ ਕਰ ਦਿੱਤਾ ਤੇ ਉਸ ਦਾ ਕੰਨ ਫੜ ਲਿਆ। ਉਸ ਨੇ ਦੱਸਿਆ ਕਿ ਉਸ ਦੇ ਪਿਤਾ ਨੇ ਉਸ ਨੂੰ ਬਚਾਉਣ ਦੀ ਬਹੁਤ ਕੋਸ਼ਿਸ਼ ਕੀਤੀ ਪਰ ਜਦੋਂ ਪਿਤਾ ਨੇ ਦੇਖਿਆ ਕਿ ਕੁੱਤਾ ਉਸ ਨੂੰ ਨਹੀਂ ਛੱਡ ਰਿਹਾ ਤਾਂ ਅੰਤ ਵਿਚ ਉਸ ਦੇ ਪਿਤਾ ਨੇ ਬੜੀ ਮੁਸ਼ਕਿਲ ਨਾਲ ਕੁੱਤੇ ਦਾ ਮੂੰਹ ਫੜ ਕੇ ਕੁੱਤੇ ਦਾ ਮੂੰਹ ਦਬਾਇਆ ਤਾਂ ਜਾ ਕੇ ਕੁੱਤੇ ਨੇ ਉਸ ਨੂੰ ਛੱਡਿਆ। ਇਸ ਸਬੰਧੀ ਸਿਵਲ ਹਸਪਤਾਲ ਬਟਾਲਾ ਦੇ ਡਾ. ਗੁਰਪਾਲ ਸਿੰਘ ਨੇ ਦੱਸਿਆ ਕਿ ਬੱਚੇ ਦਾ ਕੰਨ ਬੁਰੀ ਤਰਾਂ੍ਹ ਕੱਟਿਆ ਹੋਇਆ ਹੈ। ਫਿਲਹਾਲ ਬੱਚੇ ਦੀ ਹਾਲਤ ਸਥਿਰ ਹੈ ਅਤੇ ਉਸਦਾ ਇਲਾਜ ਚੱਲ ਰਿਹਾ ਹੈ। ਬੱਚੇ ਨੂੰ ਡਾਕਟਰਾਂ ਨੇ ਕੁੱਤੇ ਦੇ ਕੱਟਣ ਦਾ ਟੀਕਾ ਲਗਾ ਦਿੱਤਾ ਹੈ। ਗੰਭੀਰ ਜ਼ਖ਼ਮੀ ਬੱਚੇ ਗੁਰਪ੍ਰਰੀਤ ਸਿੰਘ ਦੀ ਦਾਦੀ ਹਰਦੀਪ ਕੌਰ ਤੇ ਚਾਚਾ ਬਲਜੀਤ ਸਿੰਘ ਨੇ ਮੰਗ ਕੀਤੀ ਹੈ ਕਿ ਦੋਸ਼ੀ ਵਿਰੁੱਧ ਕਾਰਵਾਈ ਕੀਤੀ ਜਾਵੇ ਅਤੇ ਪਿਟਬੁੱਲ ਰੱਖਣ ਵਾਲਿਆ ਸਖ਼ਤ ਕਾਰਵਾਈ ਕੀਤੀ ਜਾਵੇ।