ਆਮ ਆਦਮੀ ਪਾਰਟੀ ਦੀ ਸਰਕਾਰ 'ਚ ਮਜ਼ਦੂਰ ਵਰਗ ਦੋ ਵਕਤ ਦੀ ਰੋਟੀ ਰੋਜ਼ੀ ਤੋਂ ਆਤਰ ਹੋਇਐ - ਮੰਗਲ ਸਿੰਘ ਸਹੋਤਾ

ਅੰਮ੍ਰਿਤਸਰ,28 ਸਤੰਬਰ(ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ, ਨੀਰਜ ਸ਼ਰਮਾ ) - ਬਹੁਜਨ ਸਮਾਜ ਪਾਰਟੀ ਦੇ ਜਿਲ੍ਹਾ ਪ੍ਰਧਾਨ ਮੰਗਲ ਸਿੰਘ ਸਹੋਤਾ ਨੇ ਅੱਜ ਮਜ਼ਦੂਰਾਂ ਦੀਆਂ ਸਮੱਸਿਆਵਾਂ ਨੂੰ ਸੁਣਿਆ ਅਤੇ ਉਹਨਾਂ ਨੂੰ ਭਰੋਸਾ ਦਿੱਤਾ ਕਿ ਬਸਪਾ ਉਹਨਾਂ ਦੀਆਂ ਹੱਕੀ ਮੰਗਾਂ ਦਾ ਸਮਰਥਨ ਕਰਦੀ ਹੋਈ ਪੰਜਾਬ ਸਰਕਾਰ ਤੋਂ ਮੰਗ ਕਰਦੀ ਹੈ ਕਿ ਉਹ ਇਸ ਕਮਰ ਤੋੜ ਮਹਿੰਗਾਈ ਦੇ ਦੌਰ ਵਿੱਚ ਮਜ਼ਦੂਰਾਂ ਦੀਆਂ ਪ੍ਰੇਸ਼ਾਨੀਆਂ ਨੂੰ ਦੂਰ ਕਰਨ ਦੇ ਯਤਨ ਕਰੇ। ਉਹਨਾਂ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੇ ਮਜ਼ਦੂਰਾਂ ਨਾਲ ਚੋਣਾਂ ਸਮੇਂ ਅਨੇਕਾਂ ਤਰ੍ਹਾਂ ਦੇ ਵਾਆਦੇ ਕੀਤੇ ਸਨ।ਜਿਸ ਵਿੱਚ ਉਹਨਾਂ ਦੀ ਮਜ਼ਦੂਰੀ ਦੁੱਗਣੀ ਕਰਨ ਅਤੇ ਰੇਤ/ਬਜਰੀ/ਇੱਟਾਂ ਦੇ ਰੇਟ ਕੰਟਰੋਲ ਵਿੱਚ ਕੀਤੇ ਜਾਣਗੇ, ਪ੍ਰੰਤੂ ਅੱਜ ਰੇਤਾ ਦੇ ਭਾਅ ਆਸਮਾਨ ਨੂੰ ਛੋਹ ਰਹੇ ਹਨ। ਇਮਾਰਤਾਂ ਦੀ ਉਸਾਰੀ ਦੇ ਕੰਮ ਬੰਦ ਹੋਣ ਕਾਰਨ ਮਜ਼ਦੂਰਾਂ ਦੇ ਘਰਾਂ ਵਿਚ ਦੋ ਵਕਤ ਦੀ ਰੋਟੀ ਬਣਨਾ ਵੀ ਅਤਿ ਮੁਸ਼ਕਿਲ ਹੋ ਗਿਆ ਹੈ। ਉਹਨਾਂ ਕਿਹਾ ਕਿ ਇਹੋ ਜਿਹੇ ਬਦਲਾਅ ਦੀ ਪੰਜਾਬੀਆਂ ਨੇ ਕਲਪਨਾ ਨਹੀਂ ਕੀਤੀ ਸੀ,ਜਿਹੜੇ ਮਾੜੇ ਦਿਨ ਅੱਜ ਉਨ੍ਹਾਂ ਨੂੰ ਭੁਗਤਣੇ ਪੈ ਰਹੇ ਹਨ। ਬਸਪਾ ਆਗੂ ਮੰਗਲ ਸਿੰਘ ਸਹੋਤਾ ਨੇ ਕਿਹਾ ਕਿ ਹੁਣ ਤੱਕ ਜੋ ਵੀ ਸਰਕਾਰ ਸੱਤਾ 'ਚ ਆਈ ਹੈ,ਉਨ੍ਹਾਂ ਨੇ ਹਮੇਸ਼ਾ ਹੀ ਮਜ਼ਦੂਰ ਵਰਗ ਨੂੰ ਵੱਡੇ ਵੱਡੇ ਸੁਪਨੇ ਹੀ ਦਿਖਾਏ ਹਨ।ਕਿਸੇ ਨੇ ਅੱਛੇ ਦਿਨ ਆਉਣਗੇ ਅਤੇ ਕਿਸੇ ਨੇ ਇਕ ਮੌਕਾ ਮੰਗ ਕੇ ਬਦਲਾਅ ਲਿਆਉਣ ਦਾ ਕਿਹਾ।ਪ੍ਰੰਤੂ ਗਰੀਬ ਵਰਗ ਨਾਲ ਇਹਨਾਂ ਮਨੂੰਵਾਦੀ ਸੋਚ ਦੀਆਂ ਧਾਰਨੀ ਪਾਰਟੀਆਂ ਨੇ ਹਮੇਸ਼ਾ ਧੋਖਾ ਹੀ ਕੀਤਾ ਹੈ।ਉਨ੍ਹਾਂ ਕਿਹਾ ਕਿ ਮਜ਼ਦੂਰਾਂ ਦੇ ਹੱਕਾਂ ਦੀ ਰਾਖੀ ਵਾਸਤੇ ਬਸਪਾ ਸੜਕਾਂ ਤੇ ਵੀ ਆ ਸਕਦੀ ਹੈ।ਉਨ੍ਹਾਂ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੂੰ ਦਲਿਤ ਅਤੇ ਮਜ਼ਦੂਰ ਵਰਗ ਦੇ ਲੋਕਾਂ ਦੇ ਹੱਕਾ ਨੂੰ ਸੁਰਖਿਅਤ ਰੱਖਣ ਭਲਾਈ ਦੀਆਂ ਸਕੀਮਾਂ ਲਿਆਉਣ ਤੇ ਜੋਰ ਦਿੱਤਾ। ਇਸ ਮੌਕੇ ਉਨ੍ਹਾਂ ਨਾਲ ਵਿਧਾਨ ਸਭਾ ਹਲਕਾ ਕੇਂਦਰੀ ਦੇ ਪ੍ਰਧਾਨ ਬੋਬੀ ਗਿੱਲ, ਹਲਕਾ ਉੱਤਰੀ ਦੇ ਪ੍ਰਧਾਨ ਕੇਵਲ ਸਿੰਘ ਅਤੇ ਸੀਨੀਅਰ ਬਸਪਾ ਆਗੂ ਹਰਜੀਤ ਸਿੰਘ ਅਬਦਾਲ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਮਜ਼ਦੂਰ ਵਰਗ ਦੇ ਲੋਕ ਵੀ ਮੌਜੂਦ ਸਨ। ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ ਪੰਜਾਬ।