ਚੋਰੀ ਦੇ ਸਾਮਾਨ ਵਾਲੀ ਗੱਡੀ ਡੇਰਾ ਬਾਬਾ ਨਾਨਕ ਦੀ ਪੁਲਸ ਨੇ ਕੀਤੀ ਕਾਬੂ,

ਬਟਾਲਾ, 9 ਦਸੰਬਰ (ਡਾ ਬਲਜੀਤ ਸਿੰਘ, ਨੀਰਜ ਸ਼ਰਮਾ, ਜਸਬੀਰ ਸਿੰਘ)- ਥਾਣਾ ਡੇਰਾ ਬਾਬਾ ਨਾਨਕ ਦੀ ਪੁਲਿਸ ਪਾਰਟੀ ਨੂੰ ਗੁਪਤ ਸੂਚਨਾ ਮਿਲੀ ਕਿ ਇਕ ਬਲੈਰੋ ਪਿਕਅਪ ਗੱਡੀ 'ਚ ਨੇੜਲੇ ਖੇਤਰ ਦੇ ਘੁੰਮ ਰਹੀ ਹੈ, ਜਿਸ ਦੇ ਚਲਦੇ ਪੁਲਿਸ ਚੌਕੀ ਮਾਲੇਵਾਲ ਵਲੋਂ ਡੇਰਾ ਬਾਬਾ ਨਾਨਕ ਫਤਹਿਗੜ੍ਹ ਚੂੜੀਆਂ ਸੜਕ 'ਤੇ ਨਾਕਾਬੰਦੀ ਕੀਤੀ | ਅਚਾਨਕ ਆ ਰਹੀ ਬਲੈਰੋ ਗੱਡੀ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਚਾਲਕ ਨੇ ਰੋਕਾਂ ਤੋੜ ਕੇ ਪੁਲਿਸ ਮੁਲਾਜ਼ਮ 'ਤੇ ਗੱਡੀ ਚੜ੍ਹਾਉਣ ਦੀ ਕੋਸ਼ਿਸ਼ ਕਰਦੇ ਹੋਏ ਗੱਡੀ ਅੱਗੇ ਭਜਾ ਲਈ | ਪੁਲਿਸ ਵਲੋਂ ਗੱਡੀ ਦਾ ਪਿੱਛਾ ਕੀਤਾ ਗਿਆ ਤੇ ਇਹ ਵੱਖ-ਵੱਖ ਸੜਕਾਂ ਤੋਂ ਹੁੰਦੀ ਹੋਈ ਬਾਰਡਰ ਕੰਢੇ ਵੱਸਦੇ ਪਿੰਡ ਘੋਨੇਵਾਲ ਦੇ ਨੇੜੇ ਸੜਕ 'ਤੇ ਗੱਡੀ ਖੜ੍ਹੀ ਕਰਕੇ ਸਾਰੇ ਲੋਕ ਕਮਾਦ ਦੀ ਫ਼ਸਲ 'ਚ ਵੜ ਗਏ ਤੇ ਕਾਹਲੀ ਨਾਲ ਉੱਥੋਂ ਅੱਗੇ ਹੋਏ ਫ਼ਰਾਰ ਹੋ ਗਏ | ਇਤਲਾਹ ਮਿਲਦਿਆਂ ਹੀ ਥਾਣਾ ਡੇਰਾ ਬਾਬਾ ਨਾਨਕ ਦੀ ਐਸ.ਐੱਚ.ਓ. ਦਿਲਪ੍ਰੀਤ ਕੌਰ ਪੁਲਿਸ ਸਮੇਤ ਪਹੁੰਚੀ ਤੇ ਨੇੜਲੇ ਖੇਤਰ ਦੀ ਤਲਾਸ਼ੀ ਦੇਰ ਸ਼ਾਮ ਤੱਕ ਲਈ ਗਈ, ਜਿੱਥੋਂ ਉਨ੍ਹਾਂ ਨੂੰ ਕਮਾਦ ਦੇ ਖੇਤ 'ਚੋਂ ਇਕ ਪਰਸ ਤੇ ਮੋਬਾਈਲ ਮਿਲਿਆ | ਪਰਸ 'ਚ ਮਿਲੇ ਆਧਾਰ ਕਾਰਡ 'ਚ ਮਜੀਠਾ ਦੇ ਰਹਿਣ ਵਾਲੇ ਸੁਖਦੇਵ ਨਾਂਅ ਦੇ ਵਿਅਕਤੀ ਦਾ ਪਤਾ ਮਿਲਿਆ ਹੈ, ਪੁਲਿਸ ਵਲੋਂ ਉਕਤ ਬਲੈਰੋ ਗੱਡੀ ਕਬਜ਼ੇ 'ਚ ਲੈ ਲਈ ਗਈ ਹੈ, ਜਿਸ 'ਚ 26 ਇਨਵਰਟਰ ਬੈਟਰੇ ਅਤੇ ਕਾਰ ਬੈਟਰੀਆਂ ਬਰਾਮਦ ਹੋਈਆਂ ਹਨ, ਜੋ ਚੋਰੀ ਦੀਆਂ ਲਗਦੀਆਂ ਹਨ | ਅਗਲੇਰੀ ਕਾਰਵਾਈ ਕਰਦਿਆਂ ਇਰਾਦਾ ਕਤਲ ਅਤੇ ਚੋਰੀ ਦੀ ਵਾਰਦਾਤ ਸੰਬੰਧੀ ਵੱਖ-ਵੱਖ ਧਾਰਾਵਾਂ ਹੇਠ ਮਾਮਲਾ ਦਰਜ ਕੀਤਾ ਗਿਆ ਹੈ | ਐਸ. ਐੱਚ.ਓ. ਦਿਲਪ੍ਰੀਤ ਕੌਰ ਨੇ ਕਿਹਾ ਕਿ ਉਕਤ ਕਬਜ਼ੇ 'ਚ ਲਈ ਗਈ ਗੱਡੀ ਵਿਚ ਕਰੀਬ 4 ਲੋਕ ਦੱਸੇ ਜਾਂਦੇ ਹਨ | ਜਲਦੀ ਹੀ ਚੋਰੀ ਨਾਲ ਸਬੰਧਿਤ ਵਿਅਕਤੀ ਸਾਹਮਣੇ ਲਿਆਂਦੇ ਜਾਣਗੇ |