ਬਜ਼ੁਰਗ ਜੋੜੇ ਦੇ ਬੈਂਕ ਚੋਂ ਕਢਵਾਏ ਪੈਸੇ ਲੁਟੇਰਿਆਂ ਨੇ ਬਲੇਡ ਮਾਰ ਕੇ ਥੈਲੇ ਵਿਚੋਂ ਕੱਢ ਕਿ ਫਰਾਰ

ਬਟਾਲਾ 24 ਅਗਸਤ ( ਬਲਜੀਤ ਸਿੰਘ . ਨੀਰਜ ਸ਼ਰਮਾ ਜਸਬੀਰ ਸਿੰਘ : )ਪੁਲਿਸ ਜ਼ਿਲ੍ਹਾ ਬਟਾਲਾ ਦਾ ਕ੍ਰਾਈਮ ਗ੍ਰਾਫ ਦਿਨੋਂ ਦਿਨ ਵਧਦਾ ਜਾ ਰਿਹਾ ਹੈ। ਚੋਰਾਂ,ਝਪਟਮਾਰਾਂ, ਅਤੇ ਲੁੱਟਾਂ-ਖੋਹਾਂ ਕਰਨ ਵਾਲਿਆਂ ਦੇ ਹੌਂਸਲੇ ਬੁਲੰਦ ਹਨ ਅਤੇ ਆਏ ਦਿਨ ਕਿਸੇ ਨਾ ਕਿਸੇ ਘਟਨਾ ਨੂੰ ਅੰਜਾਮ ਦਿੰਦੇ ਰਹਿੰਦੇ ਹਨ।ਤਾਜ਼ਾ ਘਟਨਾ ਥਾਣਾ ਕਾਦੀਆਂ ਦੀ ਪੁਰਾਣੀ ਸਬਜੀ ਮੰਡੀ ਦੀ ਹੈ ਜਿੱਥੇ ਇਕ ਬਜੁਰਗ ਪਤੀ ਪਤਨੀ ਨੇ ਬੈਂਕ ਚੋਂ ਪੈਸੇ ਕਢਵਾ ਕੇ ਥੈਲੇ ਵਿੱਚ ਪਾਏ ਪਰ ਬੈਂਕ ਵਿੱਚੋਂ ਬਾਹਰ ਨਿਕਲਣ ਤੋਂ ਪਹਿਲਾਂ ਹੀ ਉਨ੍ਹਾਂ ਦੇ ਥੈਲੇ ਵਿੱਚ ਬਲੇਡ ਮਾਰ ਕੇ ਕਿਸੇ ਨੇ ਪੈਸੇ ਕੱਢ ਲਏ। ਹਾਲਾਂਕਿ ਪੀੜਤ ਸਰੂਪ ਸਿੰਘ ਦਾ ਕਹਿਣਾ ਹੈ ਕਿ ਤੇ ਘਟਨਾ ਬੈਂਕ ਦੇ ਅੰਦਰ ਹੀ ਵਾਪਰੀ ਹੈ ਕਿਉਂਕਿ ਉਨ੍ਹਾਂ ਨੁੰ ਬੈਂਕ ਤੋਂ ਬਾਹਰ ਨਿਕਲਣ ਤੋਂ ਪਹਿਲਾਂ ਹੀ ਪਤਾ ਲੱਗ ਗਿਆ ਸੀ ਕਿ ਉਹਨਾਂ ਦੇ ਪੈਸੇ ਚੋਰੀ ਹੋ ਚੁੱਕੇ ਹਨ ਪਰ ਸਬੰਧਤ ਬੈਂਕ ਅਧਿਕਾਰੀ ਇਸ ਗੱਲ ਨੂੰ ਮੰਨਣ ਲਈ ਤਿਆਰ ਨਹੀਂ ਸਨ ਕਿ ਘਟਨਾ ਬੈਂਕ ਦੇ ਅੰਦਰ ਵਾਪਰੀ ਹੈ। ਉਧਰ ਪੀੜਤ ਦੀ ਸ਼ਿਕਾਇਤ ਤੋਂ ਬਾਅਦ ਥਾਣਾ ਕਾਦੀਆਂ ਪੁਲੀਸ ਨੇ ਤਫ਼ਤੀਸ਼ ਸ਼ੁਰੂ ਕਰ ਦਿੱਤੀ ਹੈ ਬੈਂਕ ਦੇ ਕੈਮਰੇ ਵੇਖ ਕੇ ਲੁਟੇਰਿਆਂ ਬਾਰੇ ਸੁਰਾਗ ਜੁਟਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਪੀੜਤ ਸਰੂਪ ਸਿੰਘ ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਨਾਲ ਕਾਦੀਆਂ ਦੀ ਪੁਰਾਣੀ ਸਬਜ਼ੀ ਮੰਡੀ ਦੀ ਪੰਜਾਬ ਨੈਸ਼ਨਲ ਬੈਂਕ ਦੀ ਬਰਾਂਚ ਵਿੱਚ ਪੈਸੇ ਕਢਵਾਉਣ ਆਇਆ ਸੀ। ਪੈਸੇ ਕਢਵਾ ਕੇ ਉਸ ਨੇ ਥੈਲੇ ਵਿੱਚ ਰੱਖ ਲਏ ਅਤੇ ਜਦੋਂ ਬਾਹਰ ਨਿਕਲਣ ਲੱਗਾ ਤਾਂ ਉਸ ਨੂੰ ਪਤਾ ਲੱਗਿਆ ਕਿ ਕਿਸੇ ਨੇ ਥੈਲੇ ਵਿਚੋਂ ਪੈਸੇ ਕੱਢ ਲਏ ਹਨ। ਉਸ ਨੇ ਮਾਯੂਸ ਹੁੰਦਿਆਂ ਕਿਹਾ ਕਿ ਉਹ ਗਰੀਬ ਪਰਿਵਾਰ ਨਾਲ ਤਾੱਲੁਕ‌ ਰੱਖਦਾ ਹੈ ਅਤੇ 31 ਹਜ਼ਾਰ ਰੁਪਏ ਉਸ ਲਈ ਬਹੁਤ ਵੱਡੀ ਰਕਮ ਹੈ। ਉਸ ਨੇ ਪੁਲਿਸ ਪਾਸੋਂ ਮੰਗ ਕੀਤੀ ਕਿ ਬੈਂਕ ਦੇ ਸੀਸੀਟੀਵੀ ਕੈਮਰੇ ਚੰਗੀ ਤਰ੍ਹਾਂ ਚੈਕ ਕਰਕੇ ਲੁਟੇਰਿਆਂ ਨੂੰ ਗ੍ਰਿਫਤਾਰ ਕੀਤਾ ਜਾਵੇ ਅਤੇ ਉਸਦੇ ਪੈਸੇ ਵਾਪਸ ਦਿਵਾਏ ਜਾਣ।