ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਵਿਆਹ ਪੁਰਬ ਤੇ ਲੱਗਣ ਵਾਲੇ ਜੋੜ ਮੇਲੇ ਚ ਸੜਕ ਕਿਨਾਰੇ ਫੜੀ ਰੇਹੜੀ ਲਾਉਣ ਵਾਲੇ ਛੋਟੇ ਕਾਰੋਬਾਰੀਆਂ ਤੋਂ ਵਸੂਲੇ ਜਾ ਰਹੇ ਹਨ ਵੱਧ ਪੈਸੇ ਰੋਸ ਵਜੋਂ ਦਿਤਾ ਮੰਗ ਪੱਤਰ

ਬਟਾਲਾ 24 ਅਗਸਤ ( ਬਲਜੀਤ ਸਿੰਘ .ਨੀਰਜ .ਸ਼ਰਮਾ ਜਸਬੀਰ ਸਿੰਘ ) ਹਰ ਸਾਲ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਵਿਆਹ ਪੁਰਬ ਨੂੰ ਲੈਕੇ ਬਟਾਲਾ ਸ਼ਹਿਰ ਚ ਵੱਡਾ ਜੋੜ ਮੇਲਾ ਲੱਗਦਾ ਹੈ ਅਤੇ ਦੇਸ਼ ਅਤੇ ਵਿਦੇਸ਼ ਤੋਂ ਸੰਗਤ ਬਟਾਲਾ ਚ ਆਉਂਦੀ ਹੈ ਅਤੇ ਇਸ ਮੌਕੇ ਛੋਟੇ ਕਾਰੋਬਾਰੀ ਆਪਣੇ ਰੋਜ਼ਗਾਰ ਲਈ ਬਟਾਲਾ ਦੇ ਵੱਖ ਵੱਖ ਇਲਾਕਿਆਂ ਦੇ ਬਾਜ਼ਾਰਾਂ ਵਿੱਚ ਸੜਕ ਕਿਨਾਰੇ ਫੜੀ, ਰੇਹੜੀ ਅਤੇ ਛੋਟੇ ਸਟਾਲ ਲਗਾਉਂਦੇ ਹਨ ।ਇਹਨਾਂ ਛੋਟੇ ਕਾਰੋਬਾਰੀਆਂ ਦਾ ਕਹਿਣਾ ਹੈ ਕਿ ਮੇਲਾ ਵੀ ਸਾਲਾਂ ਤੋਂ ਹੋ ਰਿਹਾ ਹੈ ਅਤੇ ਉਹ ਵੀ ਕਈ ਸਾਲਾਂ ਤੋਂ ਦੂਰ ਦੁਰਾਡੇ ਇਲਾਕੇ ਤੋਂ ਕਾਰੋਬਾਰ ਲਈ ਅਤੇ ਆਪਣੇ ਪਰਿਵਾਰ ਦੇ ਪਾਲਣ ਲਈ ਇਥੇ ਆ ਰਹੇ ਹਨ।ਉਹਨਾਂ ਨੂੰ ਵਿਆਹ ਪੁਰਬ ਦਾ ਸਾਰਾ ਸਾਲ ਇੰਤਜ਼ਾਰ ਰਹਿੰਦਾ ਹੈ ਕਿਉਂਕਿ ਇਸ ਮੌਕੇ ਉਨ੍ਹਾਂ ਦੀ ਚੰਗੀ ਵਿਕਰੀ ਹੋ ਜਾਂਦੀ ਹੈ ਜੋ ਸਟਾਲ ਜਾ ਰੇਹੜੀ ਉਹ ਲਾਗਉਂਦੇ ਹਨ ਉਹਨਾਂ ਦੀ ਤਹਿ ਬਾਜ਼ਾਰੀ ਫੀਸ ਵਜੋਂ ਪਹਿਲਾ ਨਗਰ ਕੌਂਸਿਲ ਉਹਨਾਂ ਕੋਲ ਕੁਝ ਪੈਸੇ ਲੈਂਦੀ ਆ ਰਹੀ ਸੀ ਅਤੇ ਉਸ ਤੇ ਉਹਨਾਂ ਕਦੇ ਇਤਰਾਜ਼ ਵੀ ਨਹੀਂ ਕੀਤਾ ਲੇਕਿਨ ਪਿਛਲੇ ਸਾਲ ਵੀ ਅਤੇ ਇਸ ਸਾਲ ਵੀ ਨਗਰ ਨਿਗਮ ਬਟਾਲਾ ਵਲੋਂ ਠੇਕੇਦਾਰੀ ਪ੍ਰਣਾਲੀ ਰਾਹੀਂ ਉਹਨਾਂ ਕੋਲੋਂ ਜਬਰਨ ਲੋੜ ਤੋਂ ਵੱਧ ਪੈਸੇ ਵਸੂਲ ਕੀਤੇ ਜਾ ਰਹੇ ਹਨ, ਵਸੂਲ ਕੀਤੇ ਜਾ ਰਹੇ ਪੈਸੇ ਧੀਆਂ ਨੂੰ ਕਿਸੇ ਚੰਗੇ ਇਲਾਕਿਆਂ ਵਿਚ ਬਣੀ ਦੁਕਾਨ ਦੇ ਕਿਰਾਏ ਤੋਂ ਵੀ ਵੱਧ ਵਸੂਲੇ ਜਾ ਰਹੇ ਹਨ ਜਦਕਿ ਉਹ ਤਾਂ ਬਹੁਤ ਛੋਟਾ ਜਿਹਾ ਕਾਰੋਬਾਰ ਕਰਦੇ ਹਨ। ਜਿਸ ਲਈ ਉਹ ਉਨੀਂ ਰਕਮ ਨਹੀਂ ਦੇ ਸਕਦੇ ਜਿਸ ਦੇ ਰੋਸ ਵਜੋਂ ਉਹਨਾਂ ਵਲੋਂ ਅੱਜ ਨਗਰ ਨਿਗਮ ਬਟਾਲਾ ਦੀ ਕਮਿਸ਼ਨਰ ਨੂੰ ਮੰਗ ਪੱਤਰ ਦਿਤਾ ਗਿਆ ਹੈ ਕਿ ਉਹਨਾਂ ਗਰੀਬ ਲੋਕਾਂ ਨਾਲ ਸਰਕਾਰ ਅਤੇ ਪ੍ਰਸ਼ਾਸ਼ਨ ਧੱਕਾ ਨਾ ਕਰੇ। ਉਹਨਾਂ ਕਿਹਾ ਕਿ ਜੇਕਰ ਉਹਨਾਂ ਦੀ ਮੰਗ ਪੂਰੀ ਨਾ ਹੋਈ ਤਾ ਉਹ ਰੋਸ ਪ੍ਰਦਰਸ਼ਨ ਦਾ ਰਾਹ ਅਪਨਾਉਣ ਲਈ ਮਜਬੂਰ ਹੋਣਗੇ | ਉਧਰ ਨਗਰ ਨਿਗਮ ਬਟਾਲਾ ਦੀ ਕਮਿਸ਼ਨਰ ਦਾ ਕਹਿਣਾ ਹੈ ਕਿ ਉਹਨਾਂ ਦੇ ਧਿਆਨ ਚ ਇਹ ਮਾਮਲਾ ਆਇਆ ਹੈ ਅਤੇ ਜੋ ਠੇਕੇਦਾਰ ਨੂੰ ਠੇਕਾ ਦਿਤਾ ਗਿਆ ਹੈ ਉਸ ਨਾਲ ਇਹਨਾਂ ਛੋਟੇ ਕਾਰੋਬਾਰੀਆਂ ਦੀ ਮੀਟਿੰਗ ਕਰਵਾ ਕੇ ਇਸ ਮਾਮਲੇ ਦਾ ਹੱਲ ਕੀਤਾ ਜਾਵੇਗਾ |