ਬੀ ਐਸ ਐਫ. ਦੇ ਜਵਾਨਾਂ ਨੇ ਫੜੇ ਤਿੰਨ ਟਰੱਕ > ਡਰਾਈਵਰ ਨਹੀਂ ਦੇ ਸਕੇ ਗੱਡੀਆਂ ਦੇ ਦਸਤਾਵੇਜ਼

ਬਟਾਲਾ 8 ਅਗਸਤ ( ਬਲਜੀਤ ਸਿੰਘ ਨੀਰਜ ਸ਼ਰਮਾ. ਜਸਬੀਰ ਸਿੰਘ ) ਬੀਐੱਸਐੱਫ ਦੀ 121ਵੀਂ ਬਟਾਲੀਅਨ ਦੇ ਬੀਓਪੀ ਢੀਂਡਾ ਖੇਤਰ 'ਚ ਕਾਰਜਕਾਰੀ ਕਮਾਂਡੈਂਟ ਵਿਨੈ ਡੋਗਰਾ ਤੇ ਹਿਮਾਂਸ਼ੂ ਅੰਡਰੀਆ ਨੇ ਬੀਐੱਸਐੱਫ ਜਵਾਨਾਂ ਸਮੇਤ ਰਾਤ ਵੇਲੇ ਗਸ਼ਤ ਦੌਰਾਨ ਅਧੂਰੇ ਕਾਗਜ਼ਾਤ ਵਾਲ਼ੇ ਤਿੰਨ ਟਰੱਕ ਰੇਤ ਤੇ ਬਜਰੀ ਨਾਲ ਭਰੇ ਕਾਬੂ ਕੀਤੇ। ਇਸ ਮੌਕੇ ਡੀਆਈਜੀ ਪ੍ਰਭਾਕਰ ਜੋਸ਼ੀ ਨੇ ਦੱਸਿਆ ਕਿ ਸਰਹੱਦ 'ਤੇ ਪਾਕਿਸਤਾਨੀ ਡ੍ਰੋਨ ਸਬੰਧੀ ਖੁਫੀਆ ਸੂਚਨਾ ਮਿਲਣ ਉਪਰੰਤ ਸ਼ਨਿੱਚਰਵਾਰ ਅੱਧੀ ਰਾਤ ਨੂੰ ਕਰੀਬ ਡੇਢ ਵਜੇ ਬੀਐੱਸਐੱਫ ਜਵਾਨਾਂ ਗਸ਼ਤ ਕਰ ਰਹੇ ਸਨ।ਇਸੇ ਦੌਰਾਨ ਉਨ੍ਹਾਂ ਨੇ ਅਸ਼ੋਕ ਲੇਲੈਂਡ ਟਰੱਕ ਨੰ. ਪੀਪੀਬੀ 02 ਈਜੀ0409 ਫੜਿਆ ਜੋ ਰੇਤ ਤੇ ਬੱਜਰੀ ਨਾਲ ਲੱਦਿਆ ਹੋਇਆ ਸੀ। ਜਦੋਂ ਗੱਡੀਆਂ ਸਬੰਧੀ ਦਸਤਾਵੇਜ਼ ਮੰਗੇ ਗਏ ਤਾਂ ਡਰਾਈਵਰ ਕੋਈ ਤਸੱਲੀਬਖਸ਼ ਜਵਾਬ ਨਹੀਂ ਦੇ ਸਕਿਆ। ਇਸੇ ਤਰ੍ਹਾਂ ਦੋ ਹੋਰ ਟਰੱਕ ਵੀ ਫੜੇ ਗਏ ਜਿਨ੍ਹਾਂ ਦੇ ਡਰਾਈਵਰ ਸਲਵਿੰਦਰ ਸਿੰਘ ਵਾਸੀ ਪਿੰਡ-ਰਾਮਪੁਰਾ ਦੀਨਾਨਗਰ ਗੁਰਦਾਸਪੁਰ ਤੇ ਹਰਪ੍ਰੀਤ ਸਿੰਘ ਵਾਸੀ ਪਿੰਡ ਦੀਵਾਨੀਵਾਲ ਬਟਾਲਾ ਜ਼ਿਲ੍ਹਾ-ਗੁਰਦਾਸਪੁਰ ਕੋਈ ਤਸੱਲੀਬਖਸ਼ ਜਵਾਬ ਨਾ ਦੇ ਸਕੇ। ਇਹ ਟਰੱਕ ਬਜਰੀ ਤੇ ਪੱਥਰ ਨਾਲ ਓਵਰਲੋਡਿਡ ਸਨ। ਜ਼ਿਕਰਯੋਗ ਹੈ ਕਿ ਅਜਿਹੇ ਓਵਰਲੋਡਿਡ ਟਰੱਕ ਸੜਕ ਨੂੰ ਨੁਕਸਾਨ ਪਹੁੰਚਾਉਣ ਦੇ ਨਾਲ-ਨਾਲ ਪਾਕਿਸਤਾਨੀ ਡ੍ਰੋਨ ਵੱਲੋਂ ਸੁੱਟੇ ਸਾਮਾਨ ਨੂੰ ਲੁਕੋ ਕੇ ਲਿਜਾ ਸਕਦੇ ਹਨ। ਬੀਐੱਸਐੱਫ ਨੇ ਤਿੰਨੇ ਟਰੱਕ ਸਬੰਧਤ ਪੁਲਿਸ ਥਾਣੇ ਨੂੰ ਸੌਂਪ ਦਿੱਤੇ ਹਨ।