ਰਾਵੀ ਦਰਿਆ ਦੇ ਪਾਣੀ ਕਾਰਨ ਬੀਐਸਐਫ ਦੀਆਂ ਚੌਕੀਆਂ ਤੇ ਕੰਡਿਆਲੀ ਤਾਰ ਨੂੰ ਲੱਗੀ ਢਾਅ

ਬਟਾਲਾ 18 ਅਗਸਤ (ਡਾ ਬਲਜੀਤ ਸਿੰਘ. ਸ਼ਰਮਾ .ਜਸਬੀਰ ਸਿੰਘ ਸਰਹੱਦੀ ਜ਼ਿਲ੍ਹਾ ਗੁਰਦਾਸਪੁਰ ਦੀ ਭਾਰਤ-ਪਾਕਿ ਕੌਮਾਂਤਰੀ ਸਰਹੱਦ ਨੇਡ਼ਿਓਂ ਵਹਿੰਦੇ ਰਾਵੀ ਦਰਿਆ ਵਿਚ ਉਜ ਦਰਿਆ ਦਾ ਪਾਣੀ ਛੱਡਣ ਕਾਰਨ ਰਾਵੀ ਵਿਚ ਪਾਣੀ ਵਧ ਗਿਆ ਹੈ। ਵਧੇ ਪਾਣੀ ਨੇ ਸਰਹੱਦ ਨਾਲ ਲੱਗਦੇ ਖੇਤਰ ਵਿਚ ਵੱਡੀ ਤਬਾਹੀ ਮਚਾਈ ਹੈ। ਬੀਐੱਸਐੱਫ ਦੀਆਂ ਚੌਂਕੀਆਂ (ਬੀਓਪੀ), ਓਪੀ ਟਾਵਰ ਸਰਹੱਦ ’ਤੇ ਲੱਗੀ ਕੰਡਿਆਲੀ ਤਾਰ ਨੂੰ ਢਾਹ ਲਾਈ ਹੈ।ਇਸ ਤੋਂ ਇਲਾਵਾ ਰਾਵੀ ਦਰਿਆ ਦੇ ਪਾਣੀ ਕਾਰਨ ਪਿੰਡ ਕਮਾਲਪੁਰ ਦੇ ਕਿਸਾਨਾਂ ਦੀ ਕੰਡਿਆਲੀ ਤਾਰ ਪਾਰ ਕਰੀਬ 900 ਏਕਡ਼ ਜ਼ਮੀਨਾਂ ਵਿਚ ਕਾਸ਼ਤ ਕੀਤੀਆਂ ਫ਼ਸਲਾਂ ਪਾਣੀ ਵਿਚ ਡੁੱਬਣ ਕਾਰਨ ਕਿਸਾਨਾਂ ਦੇ ਸਾਹ ਸੁੱਕੇ ਹੋਏ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਬੀਐੱਸਐੱਫ ਦੇ ਸੈਕਟਰ ਗੁਰਦਾਸਪੁਰ ਤਹਿਤ ਆਉਂਦੀਆਂ ਵੱਖ-ਵੱਖ ਬੀਐੱਸਐੱਫ ਦੀਆਂ ਬਟਾਲੀਅਨਾਂ ਦੀਆਂ ਬੀਓਪੀ (ਚੌਂਕੀਆਂ) ਜਿੰਨਾ ਨੇਡ਼ਿਓਂ ਰਾਵੀ ਦਰਿਆ ਵਹਿੰਦਾ ਹੈ, ਵਿਚ ਰਾਵੀ ਦਾ ਪਾਣੀ ਭਰ ਗਿਆ ਹੈ। ਇਸ ਤੋਂ ਇਲਾਵਾ ਸਰਹੱਦ ਤੇ ਲੱਗੀ ਕੰਡਿਆਲੀ ਤਾਰ ਤੇ ਗੇਟ ਵੀ ਰਾਵੀ ਦੇ ਪਾਣੀ ਵਿਚ ਡੁੱਬ ਗਏ ਹਨ। ਦੱਸਣਯੋਗ ਹੈ ਕਿ ਸਰਹੱਦੀ ਜ਼ਿਲ੍ਹਾ ਗੁਰਦਾਸਪੁਰ ਦੀ 138 ਕਿਲੋਮੀਟਰ ਦੇ ਕਰੀਬ ਕੌਮਾਂਤਰੀ ਸਰਹੱਦ ’ਤੇ ਕਰੀਬ 8 ਥਾਵਾਂ ਤੋਂ ਰਾਵੀ ਦਰਿਆ ਭਾਰਤ ਤੇ ਪਾਕਿਸਤਾਨ ਵਿਚ ਪ੍ਰਵੇਸ਼ ਕਰਦਾ ਹੈ। ਰਾਵੀ ਦਰਿਆ ਤੇ ਵਧੇ ਪਾਣੀ ਕਾਰਨ ਪ੍ਰਭਾਵਤ ਸਰਹੱਦ ’ਤੇ ਲੱਗੀ ਕੰਡਿਆਲੀ ਤਾਰ ਓਪੀ ਟਾਵਰ ਤੇ ਕੰਡਿਆਲੀ ਤਾਰ ਨਜ਼ਦੀਕ ਗਸ਼ਤ ਕਰਨ ਵਾਲੇ ਰਸਤਿਆਂ ’ਤੇ ਰਾਵੀ ਦਾ ਪਾਣੀ ਖਡ਼੍ਹਾ ਹੋਣ ਦੇ ਬਾਵਜੂਦ ਬੀਐੱਸਐੱਫ ਦੇ ਜਵਾਨ ਦੇਸ਼ ਦੀ ਸੁਰੱਖਿਆ ਦੇ ਮੱਦੇਨਜ਼ਰ ਤਾਇਨਾਤ ਹਨ। ਇਸ ਸਬੰਧੀ ਬੀਐੱਸਐੱਫ ਦੇ ਡੀਆਈਜੀ ਪ੍ਰਭਾਕਰ ਜੋਸ਼ੀ ਨੇ ਦੱਸਿਆ ਕਿ ਡੀਐੱਸ ਦੇ ਜਾਂਬਾਜ਼ ਜਵਾਨ ਰਾਵੀ ਦਰਿਆ ਦੇ ਵਧੇ ਪਾਣੀ ਤੇ ਜ਼ਹਿਰੀਲੇ ਜੀਵ ਜੰਤੂਆਂ ਦੀ ਹੋਂਦ ਦੇ ਬਾਵਜੂਦ ਦੇਸ਼ ਦੀ ਸਰਹੱਦ ਤੇ ਮੁਸਤੈਦ ਹਨ। ਕਮਾਲਪੁਰ ਦੀ 900 ਏਕਡ਼ ਫਸਲ ਪਾਣੀ ’ਚ ਡੁੱਬੀ, ਬਲਾਕ ਕਲਾਨੌਰ ਅਧੀਨ ਆਉਂਦੇ ਪਿੰਡ ਕਮਾਲਪੁਰ ਦੇ ਕਿਸਾਨਾਂ ਦੀ ਕੰਡਿਆਲੀ ਤਾਰ ਪਾਰ ਪੈਂਦੀ 900 ਏਕਡ਼ ਦੇ ਕਰੀਬ ਜ਼ਮੀਨ ਵਿਚ ਕਾਸ਼ਤ ਕੀਤੀ ਝੋਨੇ, ਸੋਇਆਬੀਨ, ਤਿਲ ਤੇ ਦਾਲ ਮਾਹ ਦੀ ਫ਼ਸਲ ਰਾਵੀ ਦਰਿਆ ਦੇ ਪਾਣੀ ਵਿਚ ਡੁੱਬ ਗਈਆਂ ਹਨ। ਇਸ ਸਬੰਧੀ ਕਿਸਾਨ ਕੁਲਦੀਪ ਸਿੰਘ, ਜਸਬੀਰ ਸਿੰਘ ਫੌਜੀ, ਹਜੂਰਾ ਸਿੰਘ, ਬਲਵਿੰਦਰ ਸਿੰਘ, ਅਵਤਾਰ ਸਿੰਘ ਨੇ ਦੱਸਿਆ ਕਿ ਕੰਡਿਆਲੀ ਤਾਰ ਵਿਚ ਪੈਂਦੀਆਂ ਉਨ੍ਹਾਂ ਦੀਆਂ ਜ਼ਮੀਨਾਂ ਵਿਚ ਰਾਵੀ ਦਰਿਆ ਦਾ ਪਾਣੀ ਦੋ ਵਾਰ ਭਰ ਚੁੱਕਾ ਹੈ। ਪ੍ਰਸ਼ਾਸਨ ਨੇ ਬੁੱਧਵਾਰ ਨੂੰ ਵੀ ਰਣਜੀਤ ਸਾਗਰ ਡੈਮ ਤੋਂ ਰਾਵੀ ਦਰਿਆ ਵਿੱਚ ਪਾਣੀ ਛੱਡਣ ਸਵਬੰਧੀ ਸਰਹੱਦੀ ਲੋਕਾਂ ਨੂੰ ਚੌਕਸ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਤੀਸਰੀ ਵਾਰ ਫ਼ਸਲਾਂ ’ਤੇ ਪਾਣੀ ਪੈਣ ਨਾਲ ਇਹ ਬਿਲਕੁਲ ਨਸ਼ਟ ਹੋਈਆਂ ਹਨ। ਵਾਹੀਯੋਗ ਜ਼ਮੀਨਾਂ ਵੀ ਖ਼ਰਾਬ ਹੋ ਜਾਣਗੀਆਂ।