ਸਮਾਜ ਸੇਵਾ ਦੇ ਖੇਤਰ ਵਿੱਚ ਲਾਇਨਸ ਕਲੱਬ ਦੀ ਬਟਾਲਾ ਸ਼ਹਿਰ ਨੂੰ ਵੱਡੀ ਦੇਣ - ਵਿਧਾਇਕ ਸ਼ੈਰੀ ਕਲਸੀ

ਲਾਇਨਸ ਕਲੱਬ ਨੇ ਬਟਾਲਾ ’ਚ ਖੂਨਦਾਨ ਕੈਂਪ ਅਤੇ ਮੈਡੀਕਲ ਚੈੱਕਅਪ ਕੈਂਪ ਲਗਾਇਆ ਬਟਾਲਾ, 4 ਅਗਸਤ (ਨੀਰਜ ਸ਼ਰਮਾ, ਜਸਬੀਰ ਸਿੰਘ, ਬਲਜੀਤ ਸਿੰਘ) - ਉੱਘੀ ਸਮਾਜ ਸੇਵੀ ਸੰਸਥਾ ਲਾਇਨਸ ਕਲੱਬ ਵੱਲੋਂ ਬਟਾਲਾ ਸ਼ਹਿਰ ਦੀ ਧਰਮਪੁਰਾ ਕਲੋਨੀ ਵਿੱਚ ਵਿਸ਼ੇਸ਼ ਕੈਂਪ ਲਗਾਇਆ ਗਿਆ, ਜਿਸ ਵਿੱਚ ਖੂਨਦਾਨ ਕੈਂਪ ਦੌਰਾਨ 100 ਯੂਨਿਟ ਖੂਨਦਾਨ ਕੀਤਾ ਗਿਆ ਅਤੇ 150 ਦੇ ਕਰੀਬ ਵਿਅਕਤੀਆਂ ਦਾ ਮੁਫ਼ਤ ਮੈਡੀਕਲ ਚੈੱਕਅਪ ਕੀਤਾ ਗਿਆ। ਇਸ ਤੋਂ ਇਲਾਵਾ 70 ਲੋੜਵੰਦ ਪਰਿਵਾਰਾਂ ਨੂੰ ਮੁਫ਼ਤ ਆਟਾ ਵੀ ਤਕਸੀਮ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਬਟਾਲਾ ਦੇ ਵਿਧਾਇਕ ਸ੍ਰੀ ਅਮਨ ਸ਼ੇਰ ਸਿੰਘ ਕਲਸੀ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਵਿਧਾਇਕ ਸ਼ੈਰੀ ਕਲਸੀ ਨੇ ਲਾਇਨਸ ਕਲੱਬ ਵੱਲੋਂ ਲੋਕ ਸੇਵਾ ਦੇ ਖੇਤਰ ਵਿੱਚ ਕੀਤੇ ਜਾ ਰਹੇ ਕਾਰਜਾਂ ਦੀ ਸਰਾਹਨਾ ਕਰਦਿਆਂ ਕਿਹਾ ਕਿ ਇਸ ਸੇਵਾ ਸੰਸਥਾ ਦੀ ਬਟਾਲਾ ਸ਼ਹਿਰ ਨੂੰ ਬਹੁਤ ਵੱਡੀ ਦੇਣ ਹੈ। ਉਨ੍ਹਾਂ ਕਿਹਾ ਕਿ ਲਾਇਨਸ ਕੱਲਬ ਨੇ ਨਗਰ ਨਿਗਮ ਬਟਾਲਾ ਨੂੰ ਸਫ਼ਾਈ ਪ੍ਰਬੰਧਾਂ ਲਈ ਮਸ਼ੀਨਰੀ ਦੇਣ ਤੋਂ ਇਲਾਵਾ ਸਿਹਤ ਵਿਭਾਗ ਨੂੰ ਹਾਈਟੈਕ ਮੋਬਾਇਲ ਲੈਬ ਦੇਣ ਦੀ ਸੇਵਾ ਕੀਤੀ ਸੀ। ਇਸ ਦੇ ਨਾਲ ਹੀ ਸ਼ਹਿਰ ਵਿੱਚ ਸੁੰਦਰ ਵਾਟਿਕਾ ਅਤੇ ਪਾਰਕਾਂ ਦੀ ਉਸਾਰੀ ਵਿੱਚ ਵੀ ਲਾਇਨਸ ਕਲੱਬ ਵੱਲੋਂ ਵੱਡਾ ਯੋਗਦਾਨ ਪਾਇਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਲਾਇਨਸ ਕਲੱਬ ਦੇ ਇੰਟਰਨੈਸ਼ਨਲ ਪਾਸਟ ਪ੍ਰਧਾਨ ਡਾ. ਨਰੇਸ਼ ਅਗਰਵਾਲ ਜੋ ਕਿ ਬਟਾਲਾ ਦੇ ਹੀ ਜੰਮਪਲ ਹਨ ਵੱਲੋਂ ਬਟਾਲਾ ਸ਼ਹਿਰ ਲਈ ਜੋ ਪ੍ਰੋਜੈਕਟ ਲਿਆਂਦੇ ਗਏ ਹਨ ਉਸ ਲਈ ਸਮੂਹ ਸ਼ਹਿਰ ਵਾਸੀ ਉਨ੍ਹਾਂ ਦੇ ਧੰਨਵਾਦੀ ਹਨ।ਵਿਧਾਇਕ ਸ਼ੈਰੀ ਕਲਸੀ ਨੇ ਕਿਹਾ ਕਿ ਲਾਇਨਸ ਕਲੱਬ ਵੱਲੋਂ ਖੂਨਦਾਨ ਕੈਂਪ ਅਤੇ ਮੈਡੀਕਲ ਚੈੱਕਅਪ ਕੈਂਪ ਲਗਾਉਣਾ ਸ਼ਲਾਘਾਯੋਗ ਕਾਰਜ ਹੈ ਅਤੇ ਅਜਿਹੇ ਲੋਕ ਸੇਵਾ ਦੇ ਕਾਰਜ ਲੋਕਾਈ ਲਈ ਲਾਹੇਵੰਦੇ ਹਨ। ਇਸ ਮੌਕੇ ਲਾਇਨਸ ਕਲੱਬ ਦੇ ਪਾਸਟ ਇੰਟਰਨੈਸ਼ਨਲ ਪ੍ਰਧਾਨ ਡਾ. ਨਰੇਸ਼ ਅਗਰਵਾਲ ਨੇ ਕਿਹਾ ਕਿ ਲਾਇਨਸ ਕਲੱਬ ਦਾ ਮੁੱਖ ਮਕਸਦ ਲੋਕ ਸੇਵਾ ਹੈ ਅਤੇ ਇਸ ਕਲੱਬ ਦਾ ਹਰ ਮੈਂਬਰ ਸਮਾਜ ਸੇਵਾ ਨੂੰ ਸਮਰਪਿਤ ਹੈ। ਉਨ੍ਹਾਂ ਕਿਹਾ ਕਿ ਲਾਇਨਸ ਕਲੱਬ ਵੱਲੋਂ ਬਟਾਲਾ ਸ਼ਹਿਰ ਵਿਚ ਵਾਟਿਕਾ ਬਣਾਉਣ ਦਾ ਜੋ ਪ੍ਰੋਜੈਕਟ ਸ਼ੁਰੂ ਕੀਤਾ ਗਿਆ ਸੀ ਉਹ ਜਲਦ ਹੀ ਮੁਕੰਮਲ ਹੋ ਜਾਵੇਗਾ। ਉਨ੍ਹਾਂ ਵਿਧਾਇਕ ਸ੍ਰੀ ਕਲਸੀ ਨੂੰ ਭਰੋਸਾ ਦਿੱਤਾ ਕਿ ਸ਼ਹਿਰ ਦੀ ਬੇਹਤਰੀ ਲਈ ਉਹ ਹਰ ਤਰਾਂ ਨਾਲ ਉਨ੍ਹਾਂ ਦਾ ਸਹਿਯੋਗ ਕਰਨ ਨੂੰ ਤਿਆਰ ਹਨ। ਇਸ ਮੌਕੇ ਵੀ.ਐੱਮ. ਗੋਇਲ ਡਾਇਰੈਕਟਰ ਲਾਇਨਸ ਕਲੱਬ, ਪਧ੍ਰਾਨ ਨਰੇਸ਼ ਲੂਥਰਾ, ਯਸਪਾਲ ਚੌਹਾਨ ਡਾਇਰੈਕਟਰ, ਰਾਕੇਸ਼ ਅਗਰਵਾਲ ਖਜ਼ਾਨਚੀ, ਹਰਭਜਨ ਸਿੰਘ ਤੂਰ, ਪਦਮ ਕੋਹਲੀ, ਹੈਪੀ ਗੁਪਤਾ, ਪ੍ਰੋਜੈਕਟ ਚੇਅਰਮੈਨ ਸੁਰਿੰਦਰਪਾਲ ਸਿੰਘ ਹੰਸਪਾਲ, ਅਜ਼ਾਦਵਿੰਦਰ ਸਿੰਘ ਕਾਕੇ ਸ਼ਾਹ, ਗਵਰਨਰ ਲਾਇਨਸ ਦਵਿੰਦਰ ਅਰੋੜਾ, ਵਾਈਸ ਐੱਸ.ਪੀ. ਸੋਂਹਦੀ, ਰਛਪਾਲ ਸਿੰਘ ਬੇਗੋਵਾਲ, ਰਾਜੀਵ ਵਿੱਗ ਅਤੇ ਉਨ੍ਹਾਂ ਦੀ ਟੀਮ, ਯੋਗੇਸ਼ ਬੇਰੀ, ਦ੍ਰਿਸ਼ਟੀ ਕਲੱਬ ਤੋਂ ਰਮਨ ਗੁਪਤਾ, ਵਿਕਰਮ ਚੌਹਾਨ, ਰਮਨ ਸੈਣੀ, ਸੁਰਿੰਦਰ ਅਗਰਵਾਲ ਆਦਿ ਹਾਜ਼ਰ ਸਨ।