ਬਟਾਲਾ ਰੇਲਵੇ ਯਾਰਡ ਤੇ ਸ਼ੈਡ ਨਾ ਹੋਣ ਕਾਰਨ ਮੀਂਹ ਵਿੱਚ ਭਿੱਜੀ ਖਾਦ

ਬਟਾਲਾ, 21 ਜੂਨ(ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ,ਨੀਰਜ ਸ਼ਰਮਾ) - ਰੇਲਵੇ ਯਾਰਡ 'ਤੇ ਸ਼ੈੱਡ ਨਾ ਹੋਣ ਦਾ ਖਮਿਆਜ਼ਾ ਵਪਾਰੀਆਂ ਨੂੰ ਭੁਗਤਣਾ ਪੈਂਦਾ ਹੈ। ਬੀਤੀ ਦੇਰ ਸ਼ਾਮ ਬਟਾਲਾ 'ਚ ਆਈਪੀਐੱਲ ਕੰਪਨੀ ਦੀ ਯੂਰੀਆ ਤੇ ਡੀਏਪੀ ਖਾਦ ਦਾ ਰੈਂਕ ਆਇਆ ਸੀ ਅਤੇ ਤੇਜ਼ ਹਵਾ ਤੋਂ ਬਾਅਦ ਮੌਸਮ ਇੱਕਦਮ ਖ਼ਰਾਬ ਹੋ ਜਾਣ ਨਾਲ ਖਾਦ ਮੀਂਹ 'ਚ ਭਿੱਜ ਗਈ। ਖਾਦ ਵਿਕਰੇਤਾ ਤਿਲਕ ਰਾਜ ਅਤੇ ਆਈਪੀਐੱਲ ਕੰਪਨੀ ਦੇ ਅਧਿਕਾਰੀ ਮਨਜੀਤ ਸਿੰਘ ਮੱਲ੍ਹੀ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਬੀਤੀ ਸ਼ਾਮ ਖਾਦ ਦਾ ਰੈਕ ਆਇਆ ਸੀ ਅਤੇ ਉਸ ਰੈਕ 'ਚ ਯੂਰੀਆ ਅਤੇ ਡੀਏਪੀ ਦੀਆਂ ਕਰੀਬ 73 ਹਜ਼ਾਰ ਬੋਰੀ ਡੈਂਪ ਹੋਈ ਸੀ।ਉਨਾਂ ਦੱਸਿਆ ਕਿ ਰੇਲਵੇ ਯਾਰਡ 'ਤੇ ਜਿਹੜਾ ਸ਼ੈੱਡ ਬਣਿਆ ਹੈ, ਉਸਦੀ ਹਾਲਤ ਖ਼ਰਾਬ ਸੀ ਤੇ ਮਜ਼ਬੂਰਨ ਖਾਦ ਓਪਨ ਯਾਰਡ 'ਚ ਲਾਈ ਗਈ ਸੀ। ਉਨ੍ਹਾਂ ਦੱਸਿਆ ਕਿ ਖਾਦ ਦੇ ਡਿਸਟਰੀਬਿਊਟਰਾਂ ਵੱਲੋਂ ਆਪਣੇ ਸਾਧਨਾਂ ਰਾਹੀਂ ਖਾਦ ਦੀ ਚੁਕਵਾਈ ਕੀਤੀ ਗਈ, ਪਰ ਮੌਸਮ ਦੇ ਖ਼ਰਾਬ ਨਾਲ ਬਹੁਤ ਸਾਰੀ ਖਾਦ ਮੀਂਹ 'ਚ ਭਿੱਜ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਰੇਲਵੇ ਦੇ ਅਧਿਕਾਰੀਆਂ ਨੂੰ ਕਈ ਵਾਰੀ ਯਾਰਡ ਬਣਾਉਣ ਦੀ ਅਪੀਲ ਕੀਤੀ ਜਾ ਚੁੱਕੀ ਹੈ, ਪਰ ਅੱਜ ਤੱਕ ਕੋਈ ਸੁਣਵਾਈ ਨਹੀਂ ਹੋਈ। ਉਨ੍ਹਾਂ ਦੱਸਿਆ ਕਿ ਜਿਹੜਾ ਓਪਨ ਯਾਰਡ ਹੈ, ਉਸ ਦੀ ਵੀ ਹਾਲਤ ਖਸਤਾ ਹੋਈ ਪਈ ਹੈ। ਇੱਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਬਟਾਲਾ ਜੰਕਸ਼ਨ ਹੋਣ ਕਾਰਨ ਇਥੇ ਲੋਹਾ, ਕੱਚੀ, ਦੇਗ ਅਤੇ ਖਾਦ ਦੇ ਰੈਕ ਲੱਗਦੇ ਰਹਿੰਦੇ ਹਨ। ਇਸ ਤੋਂ ਇਲਾਵਾ ਐੱਫਸੀਆਈ ਦੇ ਗੋਦਾਮਾਂ 'ਚੋਂ ਕਣਕ ਵੀ ਦੂਜੇ ਰਾਜਾਂ ਲਈ ਮਾਲ ਗੱਡੀਆਂ ਰਾਹੀਂ ਭੇਜੀ ਜਾਂਦੀ ਹੈ। ਵਪਾਰੀਆਂ ਨੇ ਰੇਲਵੇ ਦੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਹੈ ਕਿ ਜਲਦੀ ਜਲਦੀ ਯਾਰਡ ਬਣਾਇਆ ਜਾਵੇ ਤਾਂ ਜੋ ਖਰਾਬ ਮੌਸਮ 'ਚ ਵਪਾਰੀਆਂ ਨੂੰ ਕੋਈ ਪੇ੍ਸ਼ਾਨੀ ਨਾ ਆਵੇ। ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ ਪੰਜਾਬ।