ਨਿਰਮਲ ਕੁਟੀਆਂ ਵਿਖੇ ਸੰਗਰਾਂਦ ਦੇ ਦਿਹਾੜੇ ਤੇ ਗੁਰਮਤਿ ਸਮਾਗਮ ਅਯੋਜਿਤ ਕੀਤਾ

ਅੰਮ੍ਰਿਤਸਰ,17 ਨਵੰਬਰ (ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ, ਨੀਰਜ ਸ਼ਰਮਾ) - ਆਸ਼੍ਰਮ ਨਿਰਮਲ ਕੁਟੀਆਂ,ਸਹਾਬਪੁਰ ਦੇ ਸੰਚਾਲਕ ਸੰਤ ਦਵਿੰਦਰ ਸਿੰਘ ਜੀ ਸੰਪ੍ਰਦਾਇ ਹੋਤੀ ਮਰਦਾਨ ਵਾਲਿਆਂ ਦੀ

ਰਹਿਨੁਮਾਈ ਹੇਠ ਸਮੂੰਹ ਸੰਗਤਾਂ ਦੇ ਸਹਿਯੋਗ ਨਾਲ ਦੇਸੀ ਮਹੀਨਾ ਮੱਘਰ ਦੀ ਸੰਗਰਾਂਦ ਮਨਾਈ ਗਈ ਅਤੇ ਇਸ ਸਬੰਧੀ ਗੁਰਮਤਿ ਸਮਾਗਮ ਅਯੋਜਿਤ ਕੀਤਾ ਗਿਆ।ਜਿਸ ਵਿੱਚ ਲੜੀਵਾਰ ਚੱਲ ਰਹੇਂ ਸ੍ਰੀ ਅਖੰਡਪਾਠ ਸਾਹਿਬ ਦੇ 560ਵੇਂ ਪਾਠ ਦੀ ਸੰਪੂਰਨਤਾ ਦਾ ਭੋਗ ਪਾਇਆ ਗਿਆ ਅਤੇ 561ਵਾਂ ਸ੍ਰੀ ਅਖੰਡਪਾਠ ਸਾਹਿਬ ਅਰੰਭ ਕੀਤਾ ਗਿਆ। ਇਸ ਮੌਕੇ ਨਿਰਮਲ ਕੁਟੀਆ ਦੇ ਹਜੂਰੀ ਰਾਗੀ ਭਾਈ ਜਸਬੀਰ ਸਿੰਘ, ਭਾਈ ਬੁੱਧ ਸਿੰਘ, ਭਾਈ ਸੁਖਦੇਵ ਸਿੰਘ ਤੋਂ ਇਲਾਵਾ ਭਾਈ ਅਮਰਜੀਤ ਸਿੰਘ ਤਰਨ ਤਾਰਨ ਨੇ ਅੰਮ੍ਰਿਤਮਈ ਗੁਰਬਾਣੀ ਦਾ ਰਸਭਿੰਨਾ ਸ਼ਬਦ ਕੀਰਤਨ ਕੀਤਾ।ਬਾਬਾ ਗੁਰਬਖਸ਼ ਸਿੰਘ ਦਸ਼ਮੇਸ਼ ਨਗਰ ਵਾਲਿਆਂ ਨੇ ਧਾਰਨਾ ਵਾਲੇ ਸ਼ਬਦਾਂ ਦੁਆਰਾ ਸੰਗਤਾਂ ਨੂੰ ਨਿਹਾਲ ਕੀਤਾ। ਸਿੰਘ ਸਾਹਿਬ ਗਿਆਨੀ ਮਹਿਤਾਬ ਸਿੰਘ ਗੁਰਦੁਆਰਾ ਸ੍ਰੀ ਖਡੂਰ ਸਾਹਿਬ ਨੇ ਸੰਗਤਾਂ ਨਾਲ ਗੁਰਮਤਿ ਦੀ ਸਾਂਝ ਪਾਈ।ਇਸ ਉਪਰੰਤ ਸੰਤ ਦਵਿੰਦਰ ਸਿੰਘ ਜੀ ਨੇ ਸੀ੍ਰ ਗੁਰੂ ਗਰੰਥ ਸਾਹਿਬ ਤੋਂ ਆਏ ਹੁਕਮਨਾਮੇ ਦੀ ਵਿਆਖਿਆ ਕਰਦਿਆਂ ਕਿਹਾ ਕਿ ਨਵੇਂ ਮਹੀਨੇ ਦੀ ਚੰਗੀ ਸ਼ੁਰੂਆਤ ਕਰਨ ਲਈ ਸਾਨੂੰ ਪਰਿਵਾਰ ਸਮੇਤ ਗੁਰੂਘਰ ਪਹੁੰਚਣਾ ਚਾਹੀਦਾ ਹੈ। ਸੰਗਤਾਂ ਦੇ ਦਰਸ਼ਨ ਕਰਨੇ ਅਤੇ ਗੁਰੂ ਤੋਂ ਅਸ਼ੀਰਵਾਦ ਲੈਣਾ ਚਾਹੀਦਾ ਹੈ। ਜੇ ਪੂਰਾ ਮਹੀਨਾ ਆਪਣੇ ਨਿੱਜੀ ਕਾਰੋਬਾਰ ਅਤੇ ਘਰੇਲੂ ਕੰਮਾਂ ਵਿੱਚ ਲਾਉਂਦੇ ਹਾਂ ਤਾਂ ਇੱਕ ਦਿਨ ਗੁਰੂ ਲੇਖੇ ਵੀ ਲਾਉਣਾ ਚਾਹੀਦਾ ਹੈ। ਉੱਥੋਂ ਹੀ ਸਭ ਦਾਤਾਂ ਮਿਲਣੀਆਂ ਹਨ। ਇਸ ਸਮੇਂ ਬਾਬਾ ਕੁਲਦੀਪ ਸਿੰਘ, ਭਾਜੀ ਕੁਲਦੀਪ ਸਿੰਘ, ਕੁਲਦੀਪ ਸਿੰਘ ਪਿੰਕਾ, ਬਾਬਾ ਜਸਪਾਲ ਸਿੰਘ ਧੂੰਦਾ, ਗੁਰਪ੍ਰੀਤ ਸਿੰਘ, ਅੰਮ੍ਰਿਤਪਾਲ ਸਿੰਘ, ਕੇਵਲ ਸਿੰਘ ਅੰਮ੍ਰਿਤਸਰ ਆਦਿ ਵੀ ਹਾਜ਼ਰ ਸਨ। ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ ਪੰਜਾਬ।