ਡੇਰਾ ਬਾਬਾ ਨਾਨਕ ਵਿਖੇ ਪਾਣੀ ਵਿੱਚ ਡੁੱਬ ਕੇ ਗੁੱਜਰਾਂ ਦੀਆਂ 70 ਦੇ ਕਰੀਬ ਮੱਝਾਂ ਮਰੀਆਂ

ਬਟਾਲਾ,10 ਮਈ (ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ, ਨੀਰਜ ਸ਼ਰਮਾ) - ਸਰਹੱਦੀ ਕਸਬਾ ਡੇਰਾ ਬਾਬਾ ਨਾਨਕ ਦੇ ਨਜ਼ਦੀਕ ਪਿੰਡ ਰਾਮਦੀਵਾਲੀ ਨੇੜੇ ਗੁੱਜਰਾਂ ਦੀਆਂ 70 ਦੇ ਕਰੀਬ ਮੱਝਾਂ ਪਾਣੀ ਵਿਚ ਡੁੱਬ ਕੇ ਮਰ ਗਈਆਂ | ਪੀੜਤ ਗੁੱਜਰ ਮੰਨੂ ਪੁੱਤਰ ਸਾਹੀਆ ਨੇ ਦੱਸਿਆ ਕਿ ਉਹ ਸੋਮਵਾਰ ਆਪਣੀਆਂ 70 ਦੇ ਕਰੀਬ ਮੱਝਾਂ, ਜਿਨ੍ਹਾਂ ਵਿਚ ਕੁਝ ਕਟਰੂ ਵੀ ਸਨ, ਡੇਰਾ ਬਾਬਾ ਨਾਨਕ ਤੋਂ ਪਿੰਡ ਹਰਦਰਵਾਲ ਵਿਖੇ ਲੈ ਕੇ ਜਾ ਰਹੇ ਸਨ | ਜਦ ਉਹ ਦੁਪਹਿਰ 2 ਵਜੇ ਦੇ ਕਰੀਬ ਪਿੰਡ ਰਾਮਦੀਵਾਲੀ ਨੇੜੇ ਪੁੱਜੇ ਤਾਂ ਗਰਮੀ ਹੋਣ ਕਾਰਨ ਮੱਝਾਂ ਪਾਣੀ ਪੀਣ ਲਈ ਸੱਕੀ ਦੇ ਪੁਲ ਥੱਲੇ ਖੜ੍ਹੇ ਪਾਣੀ ਵਿੱਚ ਵੜ ਗਈਆਂ | ਜਦ ਹੌਲੀ-ਹੌਲੀ ਸਾਰੀਆਂ ਮੱਝਾਂ ਪਾਣੀ ਵਿੱਚ ਵੜ ਗਈਆਂ ਤਾਂ ਜੋ ਪੁਲ ਬਹੁਤ ਨੀਵਾਂ ਸੀ, ਜਿਸ ਵਿਚ ਬੂਟੀ ਤੇ ਦਲਦਲ ਬਹੁਤ ਜ਼ਿਆਦਾ ਹੋਣ ਕਾਰਨ ਮੱਝਾਂ ਦਲਦਲ ਵਿੱਚ ਫ਼ਸ ਗਈਆਂ | ਮੱਝਾਂ ਨੂੰ ਬਾਹਰ ਕੱਢਣ ਦੀ ਕੋਸ਼ਿਸ਼ ਕੀਤੀ ਤਾਂ ਦਲਦਲ ਤੇ ਬੂਟੀ ਜ਼ਿਆਦਾ ਹੋਣ ਕਾਰਨ ਮੱਝਾਂ ਨੂੰ ਬਾਹਰ ਕੱਢਣਾ ਔਖਾ ਹੋ ਗਿਆ | ਪਿੰਡ ਦੇ ਲੋਕਾਂ ਦੇ ਸਹਿਯੋਗ ਨਾਲ ਜਦ ਟਰੈਕਟਰ ਪਾ-ਪਾ ਕੇ ਮੱਝਾਂ ਨੂੰ ਬਾਹਰ ਕੱਢਿਆ ਗਿਆ ਤਾਂ ਏਨੀ ਦੇਰ ਤਕ ਮੱਝਾਂ ਬੇਹੋਸ਼ ਹੋ ਕੇ ਮਰ ਚੁੱਕੀਆਂ ਸਨ | ਉਨ੍ਹਾ ਦੱਸਿਆ ਕਿ ਸਾਡਾ ਰੋਜ਼ੀ-ਰੋਟੀ ਦਾ ਗੁਜ਼ਾਰਾ ਹੀ ਇਨ੍ਹਾਂ ਮੱਝਾਂ ਦੇ ਦੁੱਧ ਤੋਂ ਚਲਦਾ ਹੈ | ਪੀੜਤ ਪਰਵਾਰ ਨੇ ਦੱਸਿਆ ਕਿ ਸਾਡਾ ਲੱਖਾਂ ਰੁਪਏ ਦਾ ਨੁਕਸਾਨ ਹੋ ਗਿਆ ਹੈ | ਉਨ੍ਹਾ ਉੱਚ ਅਧਿਕਾਰੀਆਂ ਤੇ ਸਰਕਾਰ ਕੋਲੋਂ ਮੰਗ ਕਰਦਿਆਂ ਕਿਹਾ ਕਿ ਸਾਨੂੰ ਬਣਦਾ ਮੁਆਵਜ਼ਾ ਦਿੱਤਾ ਜਾਵੇ, ਤਾਂ ਜੋ ਅਸੀਂ ਆਪਣੇ ਪਰਵਾਰਾਂ ਦਾ ਪਾਲਣ-ਪੋਸ਼ਣ ਕਰ ਸਕੀਏ। ਪੱਤਰ ਪ੍ਰੇਰਕ ਬਲਵੰਤ ਸਿੰਘ ਭਗਤ ਪੰਜਾਬ।